VOV4.Êđê- Hlăm jar “Klei bi lông mmuiñ đờn ca tài tử ala čar tal III- Cần Thơ thŭn 2022”, aguah 7/4, Phŭn bruă dhar kreh, mjuăt ktang asei mlei leh anăn hiu čhưn ênguê bi hgŭm hŏng ƀuôn prŏng Cần Thơ mkŏ mjing klei rang mdah kdrăp tông ayŭ dŭm djuê ana Việt Nam thŭn 2022. Klei rang mdah 100 pŏk rup leh anăn êbeh 200 hră mơar mnơ̆ng dhơ̆ng, lač kơ klei hdĭp ai tiê, mnơ̆ng dhơ̆ng dŭm djuê ana, krĭng kwar hlăm kluôm nala. Hlăm anăn, mñă klă kơ kdrăp tông ayŭ djuê ana jăk siam, êdah kldlưn mơ̆ng dŭm djuê ana Việt Nam. Klei rang mdah mkŏ mjing hŏng lu bruă ngă leh anăn boh phŭn lu jơr. Kdrăp tông ayŭ dŭm djuê ana krĭng čư̆ čhiăng nah Dưr mdê hjăn leh anăn jăk siam hŏng ênai brô̆, đĭng buôt mnuih Mông, krĭng ktuê hang ksĭ kwar Krah hŏng hgơr Parnưng, hgơr Ghi năng, brô̆ Saranai... Dŭm djuê ana krĭng Duôr čư̆ prŏng - Lăn Dap Kngư mâo rĭng čing, ki pah, brô trưng, čing boh tâo, brô̆ kram, đinh năm…

Pô mblang: H’Zawut Ƀuôn Yă