VOV4.Êđê - Hlăm ênhiang mmuñ djuê ana Jarai, mbĭt hŏng klei mmuñ bi mni kơ hdră mă bruă duh ƀơ̆ng, klei bi khăp êkei mniê, bi mni klei jăk siam mơ̆ng ƀuôn sang, lăn čar lŏ mâo dŭm klei mmuñ bi êdah ai tiê krŭ kgŭ kdơ̆ng prŏng kdrưh. Hlăm hdră kdơ̆ng mblah Mi mtlaih ala, kdriêk Sa Thầy, čar Kon Tum lehanăn kdrăn mblah ktang phĭt, mnuih ƀuôn sang dŭm djuê ana tinei sa ai tiê hluê Đảng, hluê hdră krŭ kgŭ kdơ̆ng, tŭ lu klei dleh knap, kdơ̆ng mblah mtlaih êngiê ala čar. Ai tiê anăn amâo djŏ knŏng dưi čih pioh hlăm hdruôm hră, ƀiădah dôk mâo nanao hlăm dŭm ênhiang mmuñ djuê ana Jarai.

Drei hlăk hmư̆ sa kdrêč klei kưt mmuiñ ênhiang djuê ana Jrai “Se dar ană tơring” bi mguôp mblah roh mơ̆ng aduôn Y Vol mmuiñ, mâo sang mđung asăp blŭ Việt Nam jưh dôk ti Lăn Dap Kngư mă asăp. Leh jih mmuiñ, aduôn Y Vol yăl dliê kơ ai tiê klei ñu mrâo mmuiñ: “Kâo mmuiñ klei muiñ ênhiang djuê ana anei, mơ̆ng hlăk mrâo mâo klei êngiê, hlăk iê mniê kâo mtô bi hriăm. Ară anei gơ̆ djiê leh, hlăk anăn mrâo mâo klei êngiê ñu mtô kâo hriăm klei muiñ anei mbĭt hŏng êpul kdŏ muiñ. Kâo hdơr kơ iê mniê kâo nao ngă kahan mtlaih ala hiu mdah kơ kahan dôk hlăm dliê, nao ngă cách mạng, mđĭ ai hlăm klei bi blah sua mă klei êngiê kơ ƀuôn sang. Iê kâo mtô klei muiñ lehanăn mâo lu klei bi hdơr hlăm ênuk bi blah kdơ̆ng hŏng roh. Ăt kyua anăn mơh, kâo čang hmăng mơ̆ng klei muiñ anei lŏ bi hdơr kơ ênuk dleh dlan čiăng kơ anak čô hdơr dŭm klei bi hdơr anăn hmei găn leh, lehanăn bi kriê pioh dŭm knhuah gru jăk siam anăn”.

Dưi lač hĕ, gưl nao mă asăp kưt muiñ ênhiang djuê ana pô mrâo naei mơ̆ng Anôk bruă jưh dôk ti lăn Dap Kngư mơ̆ng sang mđung asăp blŭ Việt Nam jing msĕ si sa klei lŏ wĭt kơ phŭn. Dŭm klei kưt muiñ mâo mă asăp ti Plei Čôt, wăl krah Sa Thầy, kdriêk Sa Thầy, čar Kontum mơ̆ng phung ƀuôn sang mtam mmuiñ. Digơ̆ ka tuôm mưng ôh hŏng klei mdah ti anôk lu mnuih, lehanăn ka tuôm mâo klei arăng yap jing phung mbruă hlăm klei kưt mmuiñ rei. Aduôn Y Vol lač, jih jang klei diñu mmuiñ jing klei duah tui hriăm mă hjăn, mâo knhuah mjuăt bi hriăm hlue knhuah cách mạng. “Dŭm klei muiñ mơ̆ng ênhiang djuê ana pô mơ̆ng mnuih djuê ana Jrai ti Plei Čôt. Kâo mmuiñ kơ anak čô thâo săng bi kriê pioh knhuah gru dhar kreh djuê ana Jrai, đăm lui luič ram hĕ ôh, truh kơ ară anei phung anak čô lŏ bi tui hriăm. Lu mnuih Jrai ară anei amâo lŏ thâo mmuiñ ôh dŭm klei muiñ ênhiang djuê ana hlăk ênuk bi blah Mi. Jih jang klei mmuiñ anăn, hlăm ênuk dleh dlan tuôm găn leh, brei kơ anak čô gưl êdei thâo ƀuh lehanăn hdơr. Ênuk dleh dlan dôk hlăm klei ư̆ hra êpa êsei, amâo mâo djăp êsei huă djam ƀơ̆ng dôk hlăm dliê hiu tih hbei dliê, ƀơ̆ng bi mâo mnơ̆ng sun tian. Ƀơ̆ng hbei, klei ênĭng čiăng kơ hdĭp, găn dŭm thŭn êngŭn mlan dôk hlăm klei dleh dlan lŏ dơ̆ng bi blah roh, amâo mâo tuôm thâo kral aruăt êsei. Khadah tŭ lu klei săn asei mlei snăn ƀiă dah mâo klei gĭr nanao”.

Tui si aduôn YVol ti Plei Čôt, wăl krah Sa Thầy, hlăm ênuk bi blah, dŭm klei muiñ ênhiang djuê ana mâo klei yuôm bhăn snăk bi mđĭ ai, mtrŭt mjhar phung knuă druh, lĭng kahan lehanăn jih jang phung ƀuôn sang mblah roh, sua wĭt klei êngiê kơ ƀuôn sang. Aduôn Y Vol bi hmô: “Msĕ si dŭm klei mmuiñ bi mni kơ phung knuă druh, mâo: “Amai knuă druh”, jing bi mni kơ phung amai adei mniê ngă knuă druh ênuk nao ngă cách mạng. Knuă druh hâo hưn mtô mblang jak iêo nao mŭt cách mạng čiăng kơ lăn čar mâo klei êngiê, păn kjăp klei hnŭk êngiê. Sitôhmô hlăm sa kdrêč mmuiñ “Ơ amai knuă druh cách mạng” snei:

“Ơ amai knuă druh, duah ung hlăm êpul trung đội,

Hrue mlam dôk nanao hlăm kdrăn,

Hrue mlam dôk nanao hlăm dliê,

Ơ amai knuă druh, kngan djă kdô mdiê lŏ đuĕ nao,

Ơ amai knuă druh, hlăm bung gui hră hgăm,

Ơ amai knuă druh, nao iêo jak êkei êdam mniê êra,

Ơ amai knuă druh lŏ hâo hưn hŏng phung ƀuôn sang hmư̆...”

Dŭm klei mmuiñ ênhiang djuê ana mâo anôk bruă sang mđung asăp blŭ Việt Nam jưh dôk ti lăn dăp kngư mă asăp ti kdriêk Sa Thầy, čar Kontum ăt bi êdah klei đăo knang, klei êpa mhao kơ klei êđăp ênang mơ̆ng jih jang phung ƀuôn sang. Aduôn Y Vol lač, jih jang klei hmăng hmưi mâo bi êdah hlăm klei mmuiñ ênhiang djuê ana pô, jing leh klei sĭt mơ̆ng lăn čar mâo klei êngiê.“Ơ Kontum, hmei mmuiñ čiăng nao bi blah sua wĭt klei êngiê, čiăng kơ lăn čar mâo klei hluh lir, čiăng kơ jih jang phung ƀuôn sang mâo klei êngiê, mâo sang siam, klei hdĭp mdrŏng sah, čiăng kơ jih jang mnuih mơak mñai, hơ̆k kdơ̆k hlăm klei hnŭk ênang, drei ƀuh bŏ hŏng klei jăk, êngiê ngă pưk hma, ngă lŏ pla ksu kphê, pla mdiê kuê čiăng bi trei mđao. Mơ̆ng leh mâo klei êngiê truh kơ ară anei, klei hdĭp mơak mñai, kyua mâo cách mạng mtô mtă lehanăn mkŏ mjing”.

Jih jang dŭm anôk jing knhuah gru hƀuê ênuk, kruak knăl dŭm anôk boh phao ktuang mơ̆ng lĭng kahan lehanăn phung ƀuôn sang pô bi blah Mi, hlăm krĭng lăn Sa Thầy, Kontum ăt mâo leh hlăm klei muiñ ênhiang djuê ana Jrai hŏng klei mjhĭt m’uăt hĭn. Aduôn Y Vol hưn ktưn kơ knhuah gru dhar kreh cách mạng krĭng lăn Kon siă suôr hŏng dŭm boh čư̆, čŏng čư̆ msĕ si čŏng čư̆ mrô 995 Čư̆ Tan Kra, tač êdeh phiơr bi blah Kleng... “Dŭm klei mmuiñ ênhiang djuê ana bimni kơ dŭm boh čŏng čư̆ msĕ si Čư̆ Kuh, Čư̆ Krah, Čư̆ Yan. Anăn jing dŭm boh čư̆ hlăm ƀuôn sang pô. Lui kâo mmuiñ sa kdrêč drei hmư̆:

“Ơ čŏng čư̆ Yan jing čŏng čư̆ ba akŏ mơ̆ng ƀuôn sang, Ơ čŏng čư̆ Kuh jing čư̆ năng hdơr, anôk bi klin lu mnuih,

Ơ čư̆ Tan Krah, mnuih Tan Krah hdơr nanao kơ phung ayŏng bộ đội,

Yan Ơ Yan, Čư̆ Yan lač ksŭng drŭng, Čư̆ Kuh hlŏng truh kơ čư Krah,

Ơ ayŏng amai adei drei, mđrăm mbĭt ksŭng drŭng yơh ayŏng amai adei drei...”

Ka tuôm jing mnuih thâo mmuiñ mâo klei hing ang ôh, amâo mâo tuôm hiu mdah kơ lu mnuih dlăng ôh, ƀiădah mnuih Jrai ti Plei Čôt, wăl krah Sa Thầy, kdriêk Sa Thầy, čar kontum jing leh phung mbruă anôk djă pioh lu klei yuôm bhăn kơ dhar kreh hlăm klei hdĭp djuê ana pô. Boh nik, hŏng ai tiê cách mạng mơ̆ng phung ƀuôn sang djăp djuê ana kơ anei, amâo mâo djŏ knŏng mâo čih pioh hlăm hră mơar hƀuê ênuk, ƀiădah lŏ dôk nanao hlăm dŭm klei kưt mmuiñ ênhjiang djuê ana pô./.