VOV4.Êđê - Êngao kơ boh tŭ mjưh thŭn hđăp, drông thŭn mrâo, tết jing wưng čiăng kơ mnuih Việt Nam bi êdah klei mpŭ hŏng lăn adiê, yang leh anăn klei hdơr kơ aduôn aê atâo tiêt. Tết jing wưng bi hgŭm, jing wưng bi mguôp grăp čô hlăm gŏ sang, phung anak čô dôk hriăm hră mơar, mă bruă kbưi wĭt hŏng pưk sang pô, dôk mbĭt, huă mnăm hlăm mmông drông thŭn mrâo. Khădah ară anei, lu gŏ sang lui leh đa đa klei mưng, klei bhiăn, ƀiădah klei yuôm hlăm knhuah gru dhar kreh ăt dưi djă pioh hlăm grăp boh sang, klei tur knơ̆ng amâodưi mlih ôh.  

Hruê anei, hlăm hruê ngă yang atăt yang Táo (yang kpur) wĭt kơ adiê (hlăm hruê 23 mlan 12 hluê mlan ƀlĕ), dŭm gŏ sang kih mdoh sang pui hŏng klei čang hmăng Yang Táo srăng hưn klei jăk siam hŏng Yang Adiê leh anăn dưi mâo klei êđăp ênang hlăm thŭn mrâo. Klei anei lŏ jing klei êđăp ênang hlăm bruă gang mkhư̆ truih mdjiê klei pui ƀơ̆ng, mđing anak mnuih ngă lu bruă jăk hlăm thŭn mrâo. Hŏng klei bhiăn ngă yang Công Yang Táo, klei bhiăn nao čuăn msat, klei bhiăn ngă yang hlao boh kroh hlăm knưng ngă yang kơ aduôn aê atâo atiêt, ngă yang kơ lăn ala mjing leh klei jăk siam knhuah gru dhar kreh hruê Tết mnuih Yuăn, mjing klei bhiăn hdĭp hlăm grăp gŏ sang mdê mdê. Ƀuh klei bhiăn ngă yang hlăm grăp gŏ sang gưl Tết, Ngô Minh Kiên, hđeh hriăm hră thŭn tal 1 Sang hră bruă hŏng tač êngao brei thâo “Hluê si knhuah gru gŏ sang snăn aê jing mnuih thâo răng leh anăn klă nik kơ klei bhiăn ngă yang myơr brui mngưi. Bruă kâo pô hriăm klei anei ăt jing klei yuôm bhăn mơh. Hlăm klei hdĭp mrâo mrang, mâo phung srăng duah klei yuôm bhăn đưm, phung đa đa duah klei mrâo hĭn, msĕ si kâo snăn čiăng duah ênoh yuôm đưm, anei jing sa klei găl năng mpŭ.

Hlăm dŭm hruê Tết, phung hlăm gŏ sang ya bruă ngă, phă anôk nao ăt wĭt bi hgŭm mbĭt, huă êsei bi hgŭm, bi êmuh hlăm găp djiê, mơak thŭn mrâo kơ aduôn aê, amĭ ama, nao bi kƀĭn akŏ thŭn čiăng akâo klei myun mdan, bi hơêč hmưi klei jăk siam hlăm thŭn mrâo… Lê Giang, sinh viên Sang hră gưl prŏng sự phạm Hà Nội brei thâo, klei bi hgŭm hŏng aduôn aê, amĭ ama leh anăn ayŏng amai adei jing klei mđing mrô sa hlăm gưl tết Nguyên đán: “Kâo bi mĭn ya klei jing dŏ pô kơ ênoh yuôm snăn ñu srăng jing ênoh yuôm anăn brei kriê pioh. Năng ai pô srăng amâo srăng jih ai tiê ngă ênŭm snăn ôh. Ƀiădah ya jing bruă ngă yang kơ aduôn aê, msĕ si bruă mmăt hruê 30 aguah hruê 1, hruê 2, hruê 3 snăn kâo bi mĭn ya bruă dưi ngă êlâo snăn drei ngă êlâo. Tết jing gưl čiăng gŏ sang hrăm mbĭt huă ƀơ̆ng hŏng aduôn aê, bi hruê 4,5 mâo klei găl drei dưi nao hiu čhưn ênguê."

Êngao anăn, mnuih Việt Nam lŏ mâo klei bhiăn đŭng điŏ, dăp mnga, pĕ boh, ngă bruă hlăm hruê Têt, mguôp hŏng klei čang hmăng kơ sa thŭn mrâo êđăp ênang, jăk mơak. Wăt tơdah dôk ti ƀuôn sang pô amâodah hdĭp kbưi hŏng ƀuôn sang, čar kwar, mnuih Việt Nam ăt kriê pioh klei jăk siam lu thŭn anei. Hlue si K’iăng nai prŏng, nai prĭn Nguyễn Văn Huy, Khua Sang kriê pioh ngăn drăp djuê ana Việt Nam, wăt tơdah dŭm klei bhiăn hlăm gưl Tết mâo lu klei bi mlih ƀiădah Tết nguyên đán ăt dưi kriê pioh knhuah mdê hjăn, ăt jing hruê yuôm bhăn hĭn, trei mđao hĭn mơ̆ng jih djuê ana “Kâo mĭn, hruê mmông êgao, găn lu klei bi mlih kơ bruă duh mkra ala ƀuôn, Tết ăt bi mlih lu ƀiădah klei yuôm bhăn hĭn jĭng ênoh yuôm mơ̆ng Tết ăt dôk snăn, sitôhmô truh 23 mlan 12 hluê mlan ƀlĕ drei čuh brui mngưi hdơr kơ yang công yang tao đĭ hlăm adiê, jing mlam jih jang grăp čô mnuih bi hgŭm, leh anăn hdơr kơ aduôn aê, phung ƀă ba čiêm rông leh pô”.

 Hlăm klei bi mlih mơ̆ng ala ƀuôn tuh tia mkra mjing, klei hdĭp mda mrâo mrang, dŭm klei bhiăn mâo mơh klei bi mlih čiăng djŏ guôp hŏng klei hdĭp ƀiădah Tết djuê ana ăt jing klei êdah kdlưn hlăm klei hdĭp dhar kreh mnuih Việt Nam, ăt dôk nanao grăp hruê mmông.