VOV4.Êđê- Aguah mbruê 6/6, knơ̆ng bruă dhar kreh, mjuăt ktang asei mlei čar Quảng Bình kčưm pŏk leh klei rang mdah hdruôm hră, rup hŏng akŏ “65 thŭn Quảng Bình hluê ngă asăp Awa Hồ mtô” ti sang rang mdah hƀuê ênuk čar. Klei rang mdah anei mâo giăm 1000 pŏk rup, hdruôm hră, hră mơar yuôm bhăn hŏng akŏ “65 thŭn Quảng Bình hluê ngă asăp Awa Hồ mtô”. Mta phŭn klei rang mdah jing lŏ kač rup klei hdĭp, bruă ngă leh anăn dŭm klei đru mguôp prŏng prĭn mơ̆ng khua gĭt gai Hồ Chí Minh hŏng bruă krŭ kdơ̆ng mơ̆ng Đảng, mơ̆ng djuê ana. Klei rang mdah kñăm đru mtô mjuăt bi hriăm klei mĭn cách mạng, knhuah gru khăp kơ ala čar kơ ênuk mda asei, bi râo klei hing ang djuê ana, mđĭ ai dŭm gưl mnuih ƀuôn sang čar Quảng Bình mă bruă leh anăn đru mguôp mkŏ mjing ƀuôn sang mrâo mrang, mdrŏng siam.

Pô mblang: Y-Ƀel Êban