Hŏng mta phŭng “Mkŏ knhuah gru”, klei rang mdah mâo 100 pŏk rup mơ̆ng phung mă rup dua ala čar Việt Nam leh anăn Dhŭng Korea. Hlăm anăn, mâo 60 pŏk rup mơ̆ng phung mă rup Dhŭng Korea hưn kơ klei siam wăl anôk, dhar kreh leh anăn anôk mnuih krĭng Kim Chi, 40 pŏk rup mơ̆ng phung mă rup Việt Nam hưn kơ klei siam, klei hdĭp dhar kreh leh anăn klei bi mlih mơ̆ng krĭng lăn Dak Lak, Lăn Dap Kngư.

Hluê si Hồ Sỹ Minh, k’iăng khua kiă kriê Êpul phung mă rup Việt Nam, klei rang mdah jing bruă tŭ dưn hlăm hdră mjĕ mjuk dhar kreh pla wah phung mă rup dua ala čar, đru mtrŭt agha êlam klei mjĕ giăm ƀĭng hgŭm hdră êlan kluôm dhuôm Việt Nam - Dhŭng Korea. Klei rang mdah thŭn anei bi klă 5 thŭn mjĕ mjuk plah wah Êpul mă bruă Việt Nam leh anăn Êpul phung mă rup Dhŭng Korea, leh anăn jing klei rang mdah tal 1 mkŏ mjing ti Việt Nam.

 “Dŭm pŏk rup kơ Dhŭng Korea bi êdah knhuah gru dhar kreh diñu, mâo dŭm knăm mơak, mâo dŭm djuê ana, leh anăn dŭm pŏk rup lăn čar drei ăt msĕ mơh. Kyuanăn kâo mĭn klei rang mdah tal anei jing sa klei mjĕ mjuk kơ dhar kreh, kơ bruă hiu čhưn ênguê leh anăn boh nik jing thâo kơ anak mnuih krĭng lăn anei. Klei rang mdah đru kơ dua ala čar, dua djuê ana lŏ bi giăm hĭn leh anăn thâo săng kơ hdơ̆ng pô hĭn”.

Anôk rang mdah dưi mkŏ mjing ti wăl tač Sang djă pioh mnơ̆ng đưm Dak lak, ti djiêo sang krum Êđê, mkŏ mjing gru kruăk dhar kreh kơ klei mjĕ mjuk anei.

Leh knăm mphŭn pŏk, phung mă rup Việt Nam leh anăn Dhŭng Korea srăng nao hlăm dŭm klei mă rup hlăm boh sĭt, ksiêm duah kơ klei hdĭp leh anăn knhuah siam dŭm êpul êya dŭm djuê ana čar Dak Lak.

Êlâo kơnăn, mơ̆ng hruê 7/5, êpul phung mă rup mơ̆ng 2 ala čar mâo leh klei nao mă rup klă klơ̆ng, bi mguôp nao čuă dlăng dŭm anôk hiu čhưn ênguê hing ang ti đa đa alŭ wăl Dhŭng kwar krah. Soun Byeong Hyo, khua êpul mă rup Dhŭng Korea, bi êdah ai tiê hŏng rup krĭng lăn leh anăn anak mnuih Việt Nam ti čar Dak Lak.

“Hrăm mbĭt hŏng phung mă rup mơ̆ng Việt Nam hlăm dŭm hruê nao mă rup êpul duh mâo mă lu pŏk rup siam leh anăn wĭt ti Dhŭng Korea srăng lŏ hưn mdah hŏng mnuih ƀuôn sang Dhŭng Korea kơ dŭm pŏk rup, anôk siam ti Việt Nam, boh nik ti Dak Lak leh anăn Ƀuôn Ama Thuô̆t. Kâo nao ti Việt Nam lu blư̆ leh, hlăm anăn mâo Mù Cang Chải jing anôk mâo lu pŏk rup siam leh anăn jing anôk anei, ti Ƀuôn Ama Thuô̆t ăt mâo lu pŏk rup siam. Kâo srăng mơĭt dŭm pŏk rup anăn wĭt tinei leh kâo ruah dŭm pŏk rup siam hĭn hlăm gưl anei.”