VOV4.Êđê- Ênhiang mmuiñ djuê ana Êđê mâo dua mta khăng hmư̆ jing mmuiñ Kưt leh anăn mñê Eirei. Boh phŭn ênhiang mmuiñ khăng bi mni kơ dliê kmrơ̆ng, čư̆ êa, klei hdĭp ƀuôn sang, klei khăp mniê êkei, klei khăp gŏ sang, mtă mtăn kơ anak čô… Boh nik, mâo lu klei kưt hŏng ênhiang êdu êun bi êdah klei hdơr kơ Awa Hồ. Mbĭt hŏng anăn, ăt mâo lu klei Eirei hŏng klei mơak, pral bi mni kơ ai tiê đru leh prŏng prĭn mơ̆ng Awa Hồ khăp hơiêng.

Pô thâo mbruă H’Lan Niê, kreh iêo Aduôn Thoại, dôk ti Ƀuôn Kla, să Drai Săp, kdriêk Krông Ana, čar Dak Lak brei thâo: Mơ̆ng êlâo leh, rup Awa Hồ hlăm klei mmuñ ênhiăng djuê ana Êđê msĕ hŏng mtŭ mngač atăt êlan hluê Đảng, krŭ kdơ̆ng sua wĭt klei êngiê kơ djuê ana, msĕ hŏng êlah pui hlăm mlam mmăt, brei mnuih ƀuôn sang mâo klei hdĭp trei mđao msĕ ară anei. Dŭm klei mmuñ ênhiăng kơ Awa Hồ ênưih thâo săng, ênưih hmư̆, ênưih nao hlăm ai tiê. Grăp blư̆ sĭt pô thâo mbruă mmuñ, mbĭt hŏng ênai đĭng buôt, đĭng năm, pô hmư̆ jing jăk êdi. Aduôn Thoại brei thâo:

 “Grăp blư̆ sĭt mmuñ klei mmuñ kơ Awa Hồ, phung thâo mbruă kreh yăl dliê Awa jing sa čô khua gĭt gai mâo lu klei thâo. Ti anôk ñu nao, anôk anăn mâo klei êngiê. Awa jing pô đru kơ mnuih ƀuôn sang tlaih mơ̆ng klei ktư̆ juă mơ̆ng Mi, Prăng êlâo dih. Mâo boh blŭ lač kơ Awa msĕ si: “Klei ênguôt hnĭng kơ Awa Hồ, ară anei ƀuôn sang trei mđao, hơr kơ Awa Hồ lu êdi, Pô prŭng ktiă, krơ̆ng hma pla ktơr, pla kmŭn, Awa amâo yŏng mâo mdang pui djuh siam, amâo mâo hmao mnăm êa êngeh, Awa wĭt leh hŏng aduôn aê atâo tiêt”.

Klei khăp anăn mơ̆ng mnuih Êđê hŏng Awa Hồ amâo djŏ knŏng Awa jing khua gĭt gai kơ djuê ana, ƀiădah Awa lŏ jing gru mngač hlăm klei săn asei jih klei hdĭp kơ ala čar, kơ mnuih ƀuôn sang. Pô thâo mbruă Y-Nguk Niê, kreh iêo Aê Suang, dôk ti Ƀuôn Hŭk B, să Čư̆ Mgar, kdriêk Čư̆ Mgar, čar Dak Lak brei thâo: Awa jao leh jih klei khăp kơ mnuih ƀuôn sang krĭng kwar Dhŭng, hlăm anăn mâo mnuih ƀuôn sang krĭng Lăn Dăp Kngư. Mnuih Êđê kreh bi mtă mtăn hdơ̆ng pô hlăm klei kưt mmuñ, klei mmuñ Eirei čiăng hdơr kơ klei Awa Hồ mtă brei mnuih ƀuôn sang bi mguôp, thâo bi khăp, mkŏ mjing ƀuôn sang brư̆ hruê ƀrư̆ mdrŏng siam. Aê Suang brei thâo:

“Awa Hồ jing pô ktrâo tăt ala čar mâo klei dưi hlăm klei mblah prăng, mblah Mi leh anăn ară anei mnuih ƀuôn sang mâo klei hdĭp trei mđao, yâo mơak. Awa mtă kơ mnuih ƀuôn sang krĭng Lăn Dăp Kngư srăng thâo khăp kơ ƀuôn sang, sa ai hluê Đảng leh anăn knŭk kna, mkŏ mjing ƀuôn sang ƀrư̆ hruê ƀrư̆ mdrŏng siam. Hlăm klei mmuñ ênhiăng djuê ana Êđê amâo dưi kƀah klei mmuñ kơ Awa Hồ.”

 Pô thâo mbruă Y-Nguk Niê - H’Ƀim Kƀuôr mmuiñ bi mni kơ Awa Hồ ti Sang mđung asăp blŭ Việt Nam ti Lăn Dap Kngư

Rup Awa Hồ hlăm klei mmuñ ênhiang djuê ana Êđê mâo phung thâo mbruă bi mkă, bi hmô hŏng dŭm boh blŭ kreh yua, klă mngač, hlăm anăn mâo khei khăp, klei mpŭ mơ̆ng mnuih djuê ana Êđê hŏng khua gĭt gai djuê ana. Pô thâo mbruă Y-Bruăt Êban, kreh iêo Aê Nhem, 83 thŭn, dôk ti ƀuôn Ea Sŭt, wăl krah Ea Pôč, kdriêk Čư̆ Mgar, čar Dak Lak brei thâo, Awa Hồ jing klei bi hmô kơ klei hmăng hmưi hlăm klei hdĭp, kơ klei êngiê, klei êđăpênang, leh anăn jing mta phŭn brei kơ phung thâo mbruă mâo dŭm klei mmuñ ênhiang.

“Awa Hồ jing pô gĭt gai ala čar Việt Nam. Kâo ka tuôm ƀuh ñu ôh ƀiădah grăp blư̆ kưt mmuñ mâodah mnê Eirei kơ phung anak čô, hlăm dŭm klei rang mdah kâo ăt bi mni kơ Awa Hồ. Mâo dŭm klei mmuñ msĕ sơnei: “Amâo mâo pô msĕ hŏng Awa Hồ, khua gĭt gai thâo mbruă, koh hwiê hĕ ana êruê, phŭn hlang amâo mâo siam, ba wĭt klei êđăp ênang kơ ƀuôn sang, kyuanăn hruê anei drei mâo klei hdĭp trei mđao, êđăp ênang. Ana êruê, hlang jhat tinei jing phung plah mmiă, klei kiă kriê ênuk hđăp.”

Hŏng mnuih ƀuôn sang krĭng Lăn Dăp Kngư, hlăm anăn mâo mnuih djuê ana Êđê, khădah Awa Hồ wĭt hŏng aduôn aê atâo tiêt leh, ƀiădah ñu ăt dôk hdĭp nanao hlăm grăp krông êa, hnoh êa, dliê mkrơ̆ng, čư̆ čhiăng leh anăn grăp ƀuôn êlan. Phung thâo mbruă mnuih Êđê kreh mmuñ dŭm klei hdơr kơ Awa Hồ hŏng klei kưt mbĭt hŏng ênai đing buôt, brei kơ mnuih hmư̆ mâo klei mgei ai tiê êdi. Pô thâo mbruă H’Ƀim Kƀuôr kreh iêo amĭ Ƀlan, dôk ti Ƀuôn Bling, să Čư̆ Mgar, kdriêk Čư̆ Mgar, čar Dak Lak brei thâo, Êjai mmuñ, phung thâo mbruă kreh mčeh mmuñ mmông anăn mtam, hŏng klei hdơr kơ Awa Hồ kyua djuê ana, hŏng klei hơưi, ênguôt kơ Awa nao kbưi leh.

“Drei hdơr kơ Awa ƀiădah amâodưi lŏ tuôm hŏng Awa drei mmuñ sơnei: “Ơ Awa Hồ, hmei dôk hdơr kơ ih! Hdơr kơ ƀô̆ mta ênang ih, ară anei si lŏ thâo bi tuôm kyua ih nao kbưi leh. Ih jing leh tŏng tĭt, tăng măng phiơr djăp krĭng adiê. Hmei hdơr kơ asăp ih êjai blŭ tlao. Amâo mâo pô msĕ hŏng ih, thâo lu mta bruă, jing mjing leh kơ ala čar dŭm boh mtŭ mngač mtrang brei êlan nao…”

            Dŭm klei mmuñ ênhiang jing boh blŭ mơ̆ng ai tiê pô mmuñ. Mnuih Êđê bi êdah klei hdơr knga, ênguôt kơ Awa Hồ hŏng dŭm klei mmuñ jăk siam, klă mngač. Ênhiang klei mmuñ bi êdah klei khăp, klei mpŭ kơ Awa kyua săn asei jih klei hdĭp kơ djuê ana Việt Nam. Khădah ka hmao hriê ti krĭng Lăn Dăp Kngư, ƀiădah rup Awa Hồ ăt hdĭp nanao hlăm ai tiê mnuih Êđê hŏng dŭm klei mmuñ ênhiang jak siam.

Pô mblang: Y-Ƀel Êban