VOV4.Êđê- Hŏng klei čiăng hưn mdah “Kyua sa krĭng Ngŏ Dhŭng Asi kjăp ktang hĭn” Knăm pŏk SEA Games 31 srăng mkŏ mjing hlăm 8h mlam hrue anei (12/5) ti tač mjuăt asei mlei ala čar Mỹ Đình hŏng akŏ jing: “Bi guh mngač – Let’s shine (ăt jing akŏ phŭn mơ̆ng klei muiñ mơ̆ng SEA Games 31) jing klei êpa mhao bi êdah mơ̆ng lam ai tiê hlăm klei bi mđrĭng msĕ lehanăn klei mdê mơ̆ng knhuah gru dhar kreh dŭm ala čar hlăm Êpul hgŭm Ngŏ Dhŭng Asi; iêo mthưr klei bi mguôp, bi đru čiăng mjing sa yang ƀuôn kjăp êjai tar rŏng lăn dôk găn lu mta klei dleh dlan klei lông dlăng prŏng.

Hdră pŏk srăng mkŏ mjing hŏng klei ruĕ, klei mđĭ hla čhiăm gru Việt Nam, lehanăn mmuiñ mpŭ mni ala čar, mđĭ hla čhiăm gru Ngŏ Dhŭng Asi lehanăn SEA Games 31. leh mkŏ mjing knăm pŏk, 11 čô phung bi lông mjuăt asei srăng djă kƀong pui, lehanăn tuč ti dlông gơ̆ng kbong pui SEA Games.

Knăm pŏk anei srăng bi êdah dŭm knhuah jăk siam mơ̆ng sa lăn čar Việt Nam, thâo jĕ giăm, thâo khăp kơ tue, hrăm mbĭt hŏng dŭm ala čar hlăm Êpul hgŭm ASEAN bi guh mngač, ktang hĭn leh găn klei ruă tưp Covid 19 hŏng 3 kdrêč ngă klei mdah. Tal sa: “Việt Nam thâo mjĕ mgiăm”. Tal dua: "Ngŏ Dhŭng Asi ktang"” Tal 3: “Ngŏ Dhŭng Asi guh mngač”./.

Pô mblang: Y-Khem Niê