VOV4.Êđê -Kbưi hŏng êa Nueng hlăm brô 1km, Anôk čhĭ mnŭ ăm Plit ti ƀuôn Têng 1, să Tân Sơn, ƀuôn prŏng Pleiku, čar Gialai mơ̆ng sa gŏ sang mnuih Jrai mkŏ mjing mâo hŏng anei êbeh leh 10 thŭn. Pioh čhĭ kơ tue hlăm dŭm hrue knăm 2/9, Yă H’Nač mbĭt hŏng mnuih đru bruă dôk piăt êmiêt bi mdoh pưk sang, lehanăn mprăp mkra dŭm mta mnơ̆ng ƀơ̆ng djuê ana Jrai. “Hlăm dŭm hrue knăm prŏng hlăm ala čar, boh nik knăm hrue 2/9, phung ƀuôn sang hlăm ƀuôn kreh mprăp mkra lu mta mnơ̆ng ƀơ̆ng jăk. Hmei mprăp kđeh čĭm mnŭ, čĭm ŭn dliê rông lehanăn dŭm mta mnơ̆ng ƀơ̆ng djuê ana Jrai msĕ si djam pŭng, lehanăn djăp mta djam mtam pĕ mơ̆ng pưk hma, mơ̆ng dliê. Sitôhmô, hla hbei ƀlang, điŏ brông, lehanăn djăp mtya mnơ̆ng ƀơ̆ng mkăn msĕ si êbŭng nao čoh hlăm dliê. Bi djam êbŭng, dah drông tue snăn hmei mkra hŏng lu hdră mdê mdê, tăp năng đeh hŏng čĭm, amâodah tŭk hŏng kpŭng jăk mơh”.

Sang huă ƀơ̆ng kđeh mnŭ ăm Plit ti ƀuôn Têng 1, să Tân Sơn, wăl êngao ƀuôn prŏng Pleiku, mâo mdơ̆ng hlăm sa wăl anôk lăn prŏng truh 4 sao lăn. Boh sĭt, anei jing war sang gŏ sang Ama Kiêt pô gơ̆. War anei mâo mkra msĕ hŏng sa war mnga điêt, hŏng lu boh sang krum jăk siam, mdê mdê. Grăp boh sang krum prŏng hlăm brô dŭm pluh m² djăp kơ nôk kơ phung tue dôk čhưn hdơ̆ng găp čiăng lông ƀơ̆ng dŭm mta mnơ̆ng ƀơ̆ng krĭng čư̆ čhiăng. Ama kiêt lač: “Hmei pŏk sang huă ƀơ̆ng anei ăt tui si dhar kreh mnơ̆ng ƀơ̆ng djuê ana Jrai. Tinei mkra kơ tue mnơ̆ng ƀơ̆ng tui si djuê ana Jrai, hlăm anăn mâo djam hla hbei ƀlang. Djam hla hbei ƀlang hmei mkra hŏng kđăl mnŭ, dưm wăt plăng, trŏng bhang, lehanăn mnga tei hŭng. Tal dua jing hla djam dliê tŭk mkra hŏng ariêng. Hŏng điŏ brông jing braih điŏ mdiê hma. Hmei blei braih mơ̆ng phung ƀuôn sang, kreh ruah jing braih điŏ jăk hĭn. Braih điŏ êlâo kơ brông tram hĕ hŏng êa hlăm ƀiă mmông, leh kơ anăn trông hlăm đĭng m’ô brông yơh, êngao kơ điŏ brông, snăn mnŭ ăm. Hmei blei mnŭ mơ̆ng phung ƀuôn sang rông phưi êran hiu. Mơ̆ng aguah ưm, mâo phung ƀuôn sang ba čhĭ kơ pô, kreh mâo mơ̆ng 10 - 20 drei. Anei jing mnŭ phung ƀuôn sang rông mơ̆ng dŭm boh ƀuôn hlăm să H’Bâo, să Čư̆ Dăng Ya. Mnơ̆ng tak pioh ƀơ̆ng hŏng mnŭ ăm, kreh tlê hla êsŭn điêt aruăt pĕ mơ̆ng hma, lŏ mâo hla êgil tlê mbĭt hŏng amrêč, tak kđeh čĭm mnŭ, čĭm ăm”.

Ti krah war jing tač rơ̆k prŏng. Krah tač rơ̆k anăn mâo phŭn kyâo dlông, jing anôk kreh mkŏ mjing dŭm knăm djuê ana Jrai, hŏng lu bruă ngă msĕ si tông čing, kdŏ suang jŭm kăm pui, lehanăn mdah dŭm kdrăp pĕ tông djuê ana pô. “Tơdah drông tue hmei mprăp djăp hdră kdŏ čhuang, hlăp mbul hŏng tue, lehanăn ngă tui si klei phung tue akâo, msĕ si tông čing, tông trưng, ting ning, kdŏ čhuang jŭm kăm pui. Tui si klei tue čiăng yơh, tăp năng lŏ mmuiñ dŭm klei muiñ kơ Lăn Dap Kngư čiăng kơ phung tue bi kdŏ čhuang mbĭt hŏng phung mmuiñ”.

Mbĭt hŏng klei hưn mdah kơ dhar kreh djuê ana Jrai, gŏ sang Ama kiêt ti ƀuôn Têng 1, să Tân Sơn ăt dưi lŏ mjing brei leh bruă mă kơ lu phung anak aneh hlăm alŭ wăl pô. Lehanăn, anei ăt jing anôk kăp hrui blei lu mta mnơ̆ng mơ̆ng phung ƀuôn sang rông, amâodah pla mjing mơ̆ng hma pô. “Leh gưl klei ruă tưp Covid 19, mâo lu snăk hlăm êdam êra amâo lŏ mâo bruă mă ôh, nao duah bruă ti kbưi dleh dlan, amâodah duah bruă ka djŏ hŏng klei pô čiăng. Kyuanăn, kâo mjing brei bruă knuă mă đru kơ phung amuôn adei tinei mâo bruă lehanăn hơĭt klei hdĭp mda, mâo prăk mlan pioh yua hlăm grăp hrue, lehanăn lĕ kâo kreh hrui blei mnŭ mơ̆mng phung ƀuôn sang tơdah diñu čiăng kơ prăk, čiăng čhĭ snăn kâo blei mtam”.

Khădah jing anôk čhĭ klei huă ƀơ̆ng knŏng điêt mơ̆ng gŏ sang mnuih Jrai, ƀiădah jih jang bruă mă kơnei, hlăk dôk đru leh sa kdrêč kơ bruă hiu čhưn ênguê hlăm ƀuôn prŏng Pleiku, čar Gialai. Mơ̆ng anăn, đru mjing brei leh bruă knuă kơ phung ƀuôn sang hlăm alŭ wăl, lehanăn kriê pioh, lehanăn mđĭ bi lar knhuah gru jăk siam mơ̆ng djuê ana Jrai./.

Y-Khem pô mblang