VOV4.Êđê- Knŏng adôk ƀiă hruê đuič, klei bi lông mjuăt asei mlei Ngŏ Dhŭng Asi tal 31 (SEA Games 31) klă klơ̆ng dưi pŏk. SEA Games tal anei dưi mkŏ mjing ti ƀuôn prŏng Hà Nội lehanăn 11 boh car, ƀuôn prŏng riêng giăm hŏng êbeh 7 êbâo 800 čô phung nao bi lông, nai mtô, knuă druh mơ̆ng 11 êpul mjuăt asei mlei hlăm dŭm ala čar ti alŭ wăl. Ƀuôn prŏng Phŭn Hà Nội jing anôk phŭn, anôk mkŏ mjing knăm pŏk, lehanăn knăm bi ruĕ hlăm 18 mta bi lông, dưi mkŏ mjing bi lông hlăm 14 anôk, kyuanăn, bruă mprăp êmiêt bŏ hŏng klei mjêč, lehanăn dưi bi leh ênŭm knŏng kăp drông klei bi lông. Ti čar Bắc Giang, sang bi lông mjuăt asei mlei čar dưi bi leh jih jang bruă mprăp êmiêt kơ klei bi lông pah mlâo mnŭ SEA Games 31 mơ̆ng hrue 16 – 22/5. Ti čar Hải Dương mơ̆ng hrue 13 truh kơ hrue 20/5. čar mâo bi liê leh truh 10 êklai prăk mkra wĭt dŭm anôk hlăm sang bi lông. Ti čar Hoà Bình bruă mprăp kơ klei bi lông êdeh wai jơ̆ng SEA Games 31 ngă leh ênŭm. Boh nik ti Phú Thọ, sang bi lông čar mâo mprăp leh kơ klei bi lông kơ dŭm klei čưng boh U23+3 SEA Games 31./.

Pô mblang: Y-Khem Niê