VOV4.Êđê - Čiăng rơ̆ng đru kơ Sea Games 31 dưi kčưm mkŏ mjing mơ̆ng hruê 12/5, êpul gŭp dang kông VNPT mtrŭt mđĭ leh bruă mkŏ mkra dang kông – klei hâo hưn mrâo mrang hlăm dŭm anôk mâo klei bi lông. Truh kơ ară anei, dŭm bruă knhal tuč mâo VNPT ngă tŭ jing leh anăn ngă bruă lông bi êran mprăp kơ klei bi lông mjuăt ktang asei mlei. Jing sa hlăm dŭm hdră mjuăt ktang asei mlei gưl tal êlâo hlăm alŭ wăl, hluê sui klei bi klă mơ̆ng êpul mkŏ mjing, đăo knăl, klei bi lông anei srăng iêo mthưr truh kơ 1 êklai čô dlăng mbah mđung rup leh anăn hla pŏk yang ƀuôn hŏng 1.200 mmông mđung rup. Klei anei mdưm leh dŭm klei kpĭ prŏng hlăm bruă rơ̆ng bruă mkŏ mkra dang kông – klei hâo hưn mrâo mrang đru kơ klei bi lông. Čiăng mkăp jih hnơ̆ng bruă mkŏ mkra dang kông kơ klei bi lông, VNPT mdưm leh lu êlan dang kông internet pral leh anăn dŭm kdrăp yua mđĭ êlan pui kmlă dang kông 3G, 4G hlăm dŭm anôk bi lông ti Hà Nội leh anăn 10 čar, ƀuôn prŏng mkăn. Anei jing êlan Internet dưi mkra mjing brei ba klei hâo hưn pral, mâo leh klei ksiêm dlăng leh anăn lông yua, rơ̆ng amâo mâo klei kpăk gun kñăm đru jih hnơ̆ng kơ bruă hưn mdah boh tŭ klei bi lông SEA Games 31.

Y-Ƀel pô mblang