Diih hlăk dôk hmư̆ kdrêč klei muiñ ênhiang djuê ana Jarai mơ̆ng Y Quân Mjâo pô mmuiñ. Mơ̆ng ênhiang klei muiñ snăn lŏ bi êdah knhuah klei hdĭp, kơ klei duh ƀơ̆ng, kơ klei thâo khăp kơ lăn čar kơ dŭm anak mnuih hdĭp ti knông lăn Ea Sup, čar Daklak.

 Pô mbruă Y Quân Mjâo (kreh iêo jing Ơi Khely), ti ƀuôn A2, ƀuôn hgŭm Ea Sup, čar Daklak. Amĭ kkiêng lehanăn đĭ hriê kơ prŏng hlăm krĭng lăn Ea Sup, mơ̆ng điêt hdĭp hlăm dhar kreh djuê ana pô. Dŭm mlam bi mguôp hlăm ƀuôn sang, ti djiêo kpur pui, mâo asăp muiñ ênhiang djuê ana Jarai kwang yơh msĕ si yăl dliê kơ klei hdĭp, kơ čư̆ dliê, kơ ai tiê klei khăp anak mnuih tinei. Mơ̆ng ênhiang klei muiñ anăn mjut rông leh dŭm klei muiñ ênhiang djuê ana pô hlăm ñu.  Pô mbruă Y Quân Mjâo lač:

 “Kâo raih leh hŏng ênhiang klei muiñ djuê ana mơ̆ng hlăk kâo dôk điêt. Thŭn kâo mâo 15, 16 thŭn thâo muiñ leh. Kâo kreh muiñ hlam djăp anôk, êjai mô̆ anak nao kơ hma, tăp năng êjai nao pĕ djam hlăm dliê. Ênhiang klei muiñ djuê ana Jarai hmei kreh muiñ kơ klei khăp hlkăm klei hdĭp, kơ klei khăp hlăm bruă knuă.”

Ăt msĕ hŏng lu mnuih muiñ mkăn, pô mbruă Y Quân Mjâo tui hriăm hŏng hdră dôk mđing hmư̆, lehanăn hdơr pioh. Mơ̆ng dŭm klei muiñ ênưih tal êlâo, ƀrư̆ ƀrư̆ ñu tuič lehanăn thâo muiñ dŭm klei muiñ dleh. Đŏk ñu muiñ mngač, ênưih thâo săng klă mngač, bi êdah ai tiê mơ̆ng lăn ala čư̆ dliê. ñu lŏ thâo muiñ dŭm klei muiñ kơ klei bi khăp, bi êdah ai tiê klei hdĭp mơ̆ng anak mnuih djuê ana Jarai. Dŭm boh pia mơ̆ng klei muiñ jih ai tiê, bi êdah mơ̆ng lam ai tiê phung êkei mniê hlăm ƀuôn. Ñu lač, dŭm klei muiñ lač kơ klei khăp amâo mâo djŏ knŏng bi êdah ti klei muiñ, ƀiădah jing hdră mnuih mphŭn dôk bi êdah ai tiê pô hŏng mnuih pô khăp, bi êdah ai tiê klei khăp, knhuah siam kơ klei khăp, kơ klei sĭt suôr kjăp hlăm klei hdĭp.

  “Tơdah sa čô êkei êdam hlăm ai tiê mâo hĕ klei khăp čiăng kơ sa čô mniê êra, ñu kreh mơĭt klei khăp ñu anăn hŏng klei muiñ: Kâo tui dlăng nanao ŏng adei ah, dlăng jĕ adei siam msĕ si mnga dliê. Dlăng kbưi, kdrưh nik msĕ si yang krah kdrăn. Hdơr kơ adei, ayŏng amâo ñŭ huă ƀơ̆ng, pĭt amâo mđăo. Mă bruă hdơr tinei wAr tidih. Hlăm lam ai tiê knŏng diăng diăng kơ adei'’ Bi kâo kâo khăp kơ klei kưt muiñ msĕ si sa kdrêč hlăm klei bi êwa. Hlei pô čiăng tui hriăm muiñ, kâo srăng mtô bi hriăm brei. Khădah ƀuôn sang taih kbưi dưn, kâo ăt mơak tui nao mơh, knŏng čiăng kơ ênhiang klei muin djuê ana pô dôk nanao.”

Dŭm ênhiang klei muin djuê ana Jarai mơ̆ng pô mbruă Y Quân Mjâo muiñ amâo mâo knŏng knŏng hjăn phung mduôn khua ôh khăp hmư̆, ƀiădah mâo lu phung hđeh mda asei hlăm ƀuôn khăp. Grăp blư̆ hmư̆ ñu muiñ, jih jang ñăt kriêp, jih jang mnuih bi ng ngĕ dôk hmư̆. Amâo mâo djŏ knŏng khăp kơ klei muiñ ênhiang djuê ana, phung hđeh mda asei mâo klei khăp mpŭ snăk hŏng pô mbruă anei. H Thuyên Kpă, ở buôn A2 lač.

 “Kâo hmư̆ awa anăn muiñ ênhiang klei muin djuê ana   Jarai jăk snăk, êdu êun snăk. Hlăm ƀuôn knŏng awa yơh lŏ mtô bi hriăm muiñ, jih jang mnuih khăp tui nao hriăm sơăi.”

Bi Y Nô Ksơr, buôn A1, ƀuôn hgŭm Ea Sup, čar Daklak lĕ lač:

 “Awa kreh muiñ dŭm klei muiñ ênhiang djuê ana Jarai kâo khăp snăk mđing hmư̆. Awa kreh muiñ lač kơ klei hdĭp, kơ klei khăp êkei mniê, kâo hmư̆ jăk êdi, ƀiădah ka dưi thâo jih mơh klei bi hriăm mơ̆ng klei muiñ anăn. Kâo thâo mă ƀiă đuič, snăn kâo hmăng hmưi hlăm wưng tinăp, phung êdam êra msĕ hŏng hmei srăng tui hriăm, phung hđeh điêt ăt srăng hriăm, čiăng kơ thâo ênhiang klei muiñ djuê ana pô, bi đru răng kriê knhuah gru dhar kreh pô.”

Klei muiñ mơ̆ng pô mbruă Y Quân Mjâo amâo mâo djŏ knŏng kwang hjăn hlăm ƀuôn sang pô đuič ôh, ƀiădah ñu lŏ hiu hlăm djăp anôk, ba klei muiñ anei truh hlăm dŭm anôk mdah klei kưt muiñ djuê ana Jarai pô, lŏ bi hưn mdah, lŏ bi lar knhuah gru dhar kreh djuê ana pô truh hŏng jih jang mnuih hmư̆. Hŏng klei khăp jih ai tiê, dŭm ênhiang klei muiñ djuê ana Jarai srăng dưi kriê pioh nanao, čiăng kơ asăp muiñ anăn kwang, truh hlăm lă liă krĭng lăn dap kngư anei./.