VOV4.Êđê- Djam hbâo klĭt mtei tŭk hŏng boh tei hŭng leh anăn êbŭng msăm jing sa hlăm dŭm mta djam jiă kma knhuah djuê ana mnuih M’Nông. Mguôp hŏng dŭm mta msĕ si bi mklăk ƀiădah mnuih M’Nông lŏ mkra mjing anăn dưi mâo mta mnơ̆ng ƀơ̆ng jăk, ƀâo mngưi leh anăn lu mnơ̆ng tŭ jăk.

Ară anei hlăm klei hdĭp mda aguah tlam mlam hrue djuê ana Mnông ăt adôk djă pioh klei mưng, khăp mkra djam hbâo. Boh nik jing hbâo čuh mơ̆ng klĭt mtei ksă leh ƀhu krô. Êngao kơ hbâo klĭt mtei, djam anei amâo mâo dưi kƀah ôh dua mta anăn jing boh tei hŭng, lehanăn êbŭng msăm tŭk hŏng klang čĭm. Boh tei hŭng ruah boh dôk mtah, amâodah man rak. Čiă hĕ klĭt boh tei hŭng, lehanăn khăt klŏ man ƀơ̆ng, rao hĕ bi doh ktăk. Êbŭng msăm mnuih Mnông kreh mđam sui leh, mâo klei msăm jăk. Kyuanăn, tơdah riă djam hbâo anei, êbŭng msăm lŏ kpĭt hĕ êa msăm lehanăn tram hlăm êa čiăng bi êdu hĕ mâo ƀiă klei msăm. Mnuih Mnông mă hbâo bi lŭk hŏng êa, leh kơ anăn kar hŏng mnal, amâodah ya mta mnơ̆ng pioh kar mă hĕ hru khăng. Êa hbâo anăn leh kar mă ƀuh mâo êa kñĭ uê amâodah uê uê jing tui hlue hŏng hnơ̆ng hbâo mtlai anăn lu amâodah ƀiă.

 Hbâo mtei jing sa hlăm dŭm mnŏng bi mƀăt mdê hjăn hlăm klei tŭk knă mnuih M’Nông

Mnuih Mnông lač, êa hbâo klĭt mtei lŏ ngă kơ mnơ̆ng mkăn hlăm djam riă anei pral hĭn ê’ih, kdlik hĭn, lehanăn kdrêč knhal tuič jing lông leh ƀơ̆ng bi ƀăt. Êlâo adih mnuih Mnông kreh yua lu hbâo čiăng mjing hnơ̆ng bi ƀăt, jing sa mta êa mâo hnơ̆ng msĭn pioh hrô kơ hra. Ƀiădah ară anei, mnuih Mnông êngao kơ yua hbâo pioh bi ƀăt, boh nik čiăng kơ djam riă anei jăk hĭng snăn lŏ dưm thiăm hră, bột ngọt, hạt nêm. Hŏng djam riă klĭt mtei tŭk hŏng boh tei hŭng lehanăn êbŭng msăm, mnuih Mnông lŏ tlê amrêč dưm bi ƀăt amrêč hra. Knŏng ƀiă hra, knŏng ƀiă bột ngọt mbĭt hŏng amrêč tlê ƀhĭ lŏ dưm hlăm djam. Aguah tlam mnuih Mnông kreh dưm lu amrêč hlăm djam anei.

Djam hbâo klĭt mtei tŭk hŏng boh tei hŭng leh anăn êbŭng msăm mnuih M’nông

Hŏng mnuih Mnông, djam anei mâo mnâo mnañ ñu mdê hĭn êdi, dlăng kdlik mơh snăn kơh jing jăk. Klang čĭm riă hĕ bi ê’ih srăng bi kbiă mta mmih hlai mbĭt hŏng klei hăng, klei msăm lehanăn ƀăt ƀiădah amâo mâo msĭn ôh. Djam riă anei tŭk hŏng hbâo klĭt mtei krô jing sa mta djam ƀơ̆ng

jăk, mâo klei tŭ jăk, jing djam mtam mâo leh mơ̆ng đưm djuê ana Mnông hlăm čar Daknông./.

Pô mblang: Y-Khem Niê