VOV4.Êđê - Aguah hruê 29/6, Knơ̆ng bruă ksiêm yap hưn mthâo leh mrô bruă duh mkra – ala ƀuôn 6 mlan akŏ thŭn. Klei năng mđing, khădah dôk hlăm wưng bluh mâo klei ruă Covid 19 ti lu alŭ wăl ƀiădah hnơ̆ng mâo mnơ̆ng dhơ̆ng kluôm hlăm ala čar GDP 6 mlan akŏ thŭn ăt đĭ 5,64%. Hlăm ênoh đĭ kyar kluôm mơ̆ng hdră duh mkra hlăm akŏ thŭn anei, krĭng ngă lŏ hma, krĭng bruă dliê kmrơ̆ng, mnơ̆ng hlăm êa đĭ 3,28% mkă hŏng wưng anei thŭn dih. Mta bruă ngăn prăk, knơ̆ng prăk lehanăn bảo hiểm đĭ 9,27%. Krĭng tuh tia mkra mjing lehanăn rŭ mdơ̆ng đĭ 8,36%. Khădah dôk hlăm wưng bluh mâo klei ruă hmăi amâo jăk truh kơ bruă duh mkra pla mjing, mnia mblei ƀiădah ênoh anôk bruă duh mkra nao bi mklă mkŏ mjing mrâo hlăm 6 mlan akŏ thŭn mâo êbeh 67 êbâo anôk bruă, đĭ 8,1% mkă hŏng wưng anei thŭn êlâo lehanăn đĭ 34,3% kơ ênoh prăk duh bi liê mâo bi mklă. Klei đĭ ênoh lehanăn prăk duh bi liê mơ̆ng anôk bruă duh mkra nao bi mklă mkŏ mjing mrâo brei ƀuh klei gĭr lehanăn ai tiê mphŭn čô̆ kơ bruă mơ̆ng êpul êya anôk bruă duh mkra./.

H Nêč pô mblang