VOV4.Êđê -  Tlam mbruê 29/6, ti anôk bruă Đảng gưl dlông, êpul bi ala Đảng drei mơ̆ng Võ Văn Thưởng, jing khua êpul bi ala ba anăp, nao hgŭm leh hlăm klei kƀĭn trông jhưng wil online dŭm Đảng ala čar Nga - ASEAN. Klei bi trông anei dưi mkŏ mjing tui si klei kčĕ mơ̆ng Đảng ala čar Nga hlăm wưng thŭn 2021 jing thŭn bi hdơr 30 thŭn hruê mkŏ mjing klei mjĕ giăm Nga - ASEAN, 25 thŭn klei mjĕ giăm blŭ hrăm Nga - ASEAN. Hlăm klei kƀĭn trông anăn, khua dŭm Đảng ti ala čar Nga bi êdah leh klei mĭn lŏ wĭt bi kjăp klei êđăp ênang lehanăn bi mguôp hlăm alŭ wăl Asi -  Pacific. Dŭm čô bi ala anei bi êdah klei mpŭ hlăm klei bi mguôp pla wah Nga - ASEAN, bi tŭ ư srăng mđĭ bruă bi mguôp hlăm klei răng mgang wăl hdĭt mda, đĭ kyar kjăp ktang, klei êđăp ênang klei mrâo tar rŏng lăn, mâo djăp mnơ̆ng ƀơ̆ng huă. Dŭm tĭng ăt mâo leh klei bi tŭ ư kơ bruă bi mđĭ klei bi mguôp dŭm Đảng tar rŏng lăn čiăng bi kluôm êlam hĭn klei jĕ giăm bruă kđĭ čar, bruă duh mkra lehanăn yang buôn pla wah Nga lehanăn dŭm ala čar ASEAN. Sa ai hŏng dŭm klei gĭr mbĭt čiăng dưi tlaih mơ̆ng dŭm klei lông dlăng lehanăn mgaih msir dŭm boh klei hlăm alŭ wăl.

Y Ƀel pô mblang