VOV4.Êđê - Aguah mbrue (24/6), ti anôk bruă knŭk kna, K’iăng khua knŭk kna Vũ Đức Đam, Khua Anôk bruă ala čả kiă kriê bruă mdrơ̆ng hŏng klei ruă tưp covid 19, mâo leh klei bi kƀĭn online hŏng phung khua kiă kriê čả Đồng Nai kơ djăp hdră mdrơ̆ng hŏng klei ruă tưp ară anei. Blŭ hrăm ti anôk bi kƀĭn, k’iăng khua knŭk kna Vũ Đức Đam mtă, Đồng Nai jing alŭ wăl jĕ hŏng ƀuôn prŏng Hồ Chí Minh, êbeh 500 êbâo čô mnuih mă bruă hlăm alŭ wăl duh mkra, mâo kdrŭn ksĭ, lehanăn knông hŏng čar Bình Dương... Tơdah klei ruă tưp ñu kma srăng dleh dlan êdi, kyuanăn yơh bi ksiêm dlăng kjăp mnuih mơ̆ng ƀuôn prŏng Hồ Chí Minh, mơ̆ng Bình Dương truh kơ Đồng Nai lehanăn mklăk hŏng anăn. K’iăng khua knŭk kna mñă: ksiêm dlăng kjăp amâo mâo djŏ jing gang mkhư̆ klei êrô êbat ôh, ƀiădah mđĭ hĭn bruă ba yua kdrăp mrâo mrang čiăng kiă kriê mnuih găn êrô. Hŏng mnuih mă bruă, boh nik mnuih hlăk hdĭp hlăm anôk mkăn, mă bruă hlăm dŭm anôk bruă duh mkra hlăm čar Đồng Nai, ăt bi mâo mơh hdră kiă kriê jih jang êlan êrô êbat klă mngač hlăm anôk mă bruă./.

Y Khem pô mblang