VOV4.Êđê- Tui si klei mrâo mơ̆ng knơ̆ng bruă mtô mjuăt lehanăn sang hră mơar čar Kon Tum, klei bi lông bi ruê̆ klei hriăm gưl 3 gưl tal 1 anei mâo hnơ̆ng dưi hlăm klei bi lông truh kơ 98,26 % lehanăn mâo sa mâo puăng dlưn hĭn tar rŏng lăn hlăm khối D. Hlăm klei bi lông gưl tal 1 leh êgao, čar Kon Tum mâo 4.483 čô hđeh sang hră nao ngă klei bi lông lehanăn mâo 4.405 mâo klei dưi hlăm klei bi lông anăn. Hđeh sang hră mâo puăng kdlưn hĭn tar ala čar hlăm khối D jing adei Bùi Thị Ngọc Quỳnh, adŭ 12 thơ̆ng kơ mta hriăm văn, sang hră gưl 3 chuyên Nguyễn Tất Thành hŏng puăng 29,15. Čar Dak Nông mâo hnơ̆ng dưi hlăm klei bi lông bi ruê̆ klei hriăm gưl 3 jing 97,1% hŏng 6.702 čô hđeh nao ngă klei bi lông. Hlăm anăn mâo 10 sang hră gưl 3 mâo 100% hđeh dưi hlăm klei bi lông anei. Tui si klei čih yap, mâo 80 klei bi lông mâo puăng mơ̆ng 9,25 kơ dlông, hlăm anăn mâo 50 klei bi lông mâo puăng jing 10 jing: Giáo dục công dân 50 klei bi lông, tiếng Anh 4 klei bi lông leh anăn Sinh học 3 klei bi lông.

Bi kơ čar Dak lak, hnơ̆ng dưi hlăm klei bi lông gưl tal sa anei ăt dưi mâo 97,01%. Đĭ 0,6% mkă hŏng thŭn 2020. Mâo 10 boh sang hră gưl 3 lehanăn 3 anôk mtô mjuăt (hlăm 58 sang hră gưl 3 lehanăn 15 anôk mtô mjuăt bruă mă - mtô nanao) mâo hnơ̆ng hđeh dưi truh kơ 100%. Tui si klei čih yap mơ̆ng knơ̆ng bruă mtô mjuăt lehanăn sang hră mơar čar Dak Lak, hlăm čar mâo 292 čô hđeh sang hră mâo puăng mơ̆ng 9,5 kơ dlông hŏng dŭm mta bi lông hjăn.

Pô mblang: Y-Ƀel Êban