VOV4.Êđê - Dŭm hruê mmông êgao, ti čar Gia Lai, dŭm êpul êya bruă lĭng kahan hlăm dŭm alŭ wăl bi mguôp leh hŏng êpul gĭt gai bruă gang mkhư̆ klei ruă tưp Covid-19 tui ngă dŭm hră êlan gang mkhư̆ klei ruă tưp Covid-19. Anei jing sa hlăm êpul êya kmeh gơ̆ng, êpul ba anăp bruă gang mkhư̆ klei ruă tưp Covid-19 hlăm alŭ wăl. Dŭm êpul êya mđĭ leh ênoh mnuih nao ksiêm dlăng hlăm krĭng knông lăn, mprăp mnơ̆ng yua, kdrăp yua hlăm bruă mdrao mgŭn, êpul êya nao hgŭm hlăm bruă gang mkhư̆ klei ruă tưp Covid-19.

Dơ̆ng mơ̆ng krĭng mâo klei ruă kdriêk čar Gò Vấp, ƀuôn prŏng Hồ Chí Minh wĭt kơ sang ti kdriêk Đức Cơ, čar Gia Lai, mơ̆ng knhal jih mlan 7 truh ară anei, ayŏng Hồ Hữu Trung kkiêng thŭn 1998 dưi tŭ drông lehanăn atăt ba ti anôk bi ktlah mơ̆ng Knơ̆ng gĭt gai lĭng kahan čar Gia Lai. Ayŏng Trung brei thâo, dŭm klei kčah mtrŭn hlăm hdră gang mkhư̆ klei ruă tưp tinei mâo leh grăp čô mnuih hluê ngă kjăp kyua anăn ayŏng h’ĭt mơh ai tiê “Phung lĭng kahan, aê mdrao ti sư đoàn mă bruă hŏng jih ai tiê, mđing kơ klei hdĭp ayŏng adei. Kơ bruă bi mdoh, hlăm lehanăn êngao wăl dưi rơ̆ng kjăp, klei huă ƀơ̆ng mâo mprăp djăp mnơ̆ng tŭ jăk. Kâo ksiêm mkă dlăng leh kman 3 blư̆, jih tlâo amâo ƀuh ôh. Kâo bi ala kơ jih jang mnuih dôk bi ktlah tinei, lač jăk kơ lĭng kahan, knuă druh, phung aê mdrao tinei jih ai tiê mđing dlăng kơ hmei.

Mơ̆ng akŏ thŭn truh kơ ară anei, Knơ̆ng gĭt gai lĭng kahan čar Gia Lai mkŏ mjing leh hdră bi ktlah kơ êbeh 13.500 čô mnuih. Ară anei, ti 33 anôk bruă mơ̆ng êpul êya, dôk mâo êbeh 6.700 čô mnuih ƀuôn sang dôk bi ktlah. Ciăng kơ hdră bi ktlah dưi mkŏ mjing hŏng klei êđăp ênang, gang mkhư̆ klei lŏ bi mtưp kman kơ pô mkăn.

Knơ̆ng gĭt gai lĭng kahan čar Gia Lai jao leh bruă klam kơ Adŭ đru kơ dŭm bruă tluôn, klă klơ̆ng Anôk bruă mdrao mgŭn lĭng kahan mprăp djăp ênŭm kdrăp mdrao mgŭn, mnơ̆ng mnuă, êpul nao hlăm hdră gang mkhư̆ klei ruă tưp. Mta mkăn, êpul êya bi hgŭm hŏng Knơ̆ng gĭt gai lĭng kahan čar Gia Lai mtô mblang lehanăn hluê ngă dŭm hdră msir gang mkhư̆, bi hrŏ hnơ̆ng tưp lar mơ̆ng klei ruă hlăm êpul êya yang ƀuôn, ba nao 78 čô knuă druh, lĭng kahan, kahan ƀuôn bi hgŭm hŏng kahan răng mgang knông lăn mkŏ mjing hdră hiu suang dlăng răng mgang knông lăn, gang mkhư̆ klei tlĕ mŭt hlăm ala čar soh hdră bhiăn mbĭt anăn mđĭ hdră mtô mblang kơ bruă gang mkhư̆ klei ruă tưp.

Trung tá Lê Hồng Tuấn, Khua kđông kahan răng mgang knông lăn Ia Chiá, Knơ̆ng gĭt gai lĭng kahan čar Gia Lai brei thâo: Êpul êya kriê dlăng êbeh 7km êlan lnông lăn, kah mbha 2 êpul dôk gak răng, grăp êpul 5 – 7 čô, hlăm anăn mâo 4 čô knuă druh mơ̆ng Knơ̆ng gĭt gai lĭng kahan čar Gia Lai. Knuă druh, lĭng kahan kreh nao suang dlăng, gang mkhư̆ klei tlĕ mŭt hlăm ala čar soh hdră bhiăn; pral thâo klă klei mâo ti alŭ wăl, bi hgŭm hŏng alŭ wăl nao ksiêm dlăng pral hmao ƀuh êbeh 1 êbâo čô mơ̆ng krĭng mkăn mŭt hlăm alŭ wăl, hluê ngă hdră hưn mthâo klei suaih pral, ksiêm mkă dlăng kman.

Đại tá Huỳnh Việt Dũng, K’iăng khua Knơ̆ng gĭt gai lĭng kahan čar Gia Lai brei thâo, Knơ̆ng gĭt gai lĭng kahan čar ba nao leh dŭm êtuh čô knuă druh, lĭng kahan lehanăn êpul kahan ƀuôn hluê ngă hdră mjuăt bi hriăm, bi mdoh wăl hdĭp mda, mdjiê kman lehanăn dŭm bruă nah tluôn hlăm krĭng bi ktlah rơ̆ng kjăp klei êđăp ênang hlăm hdră gang mkhư̆ klei ruă tưp: “Ară anei, hmei bi hgŭm kjăp hŏng dŭm knơ̆ng, dhar bruă mprăp djăp ênŭm hdră ngă bruă, mprăp êdeh thơ̆ng kơ bruă atăt êlan truh tinei mă mta ksiêm dlăng djŏ hdră msĕ si klei ktrâo lač mơ̆ng Phŭn bruă mdrao mgŭn, rơ̆ng kjăp klei êđăp ênang hlăm anôk bi ktlah, amâo lui klei ruă anei tưp lar”.

Mbĭt hŏng Knơ̆ng gĭt gai lĭng kahan čar Gia Lai, hlăm 2 gưl bluh mâo klei ruă mơ̆ng akŏ thŭn truh kơ ară anei, Tiểu đoàn Hoá học (Knơ̆ng bruă đru kčĕ) lehanăn êpul mkăp hlăm bruă mdrao mgŭn (Knơ̆ng đru dŭm bruă nah tluôn) hlăm kahan krĭng 3 (Phŭn bruă lĭng kahan) mkŏ mjing leh hdră bi mdjiê kman ti dŭm anôk mâo klei ruă ti wăl krah Ayŭn Pa, kdriêk Ia Pa, ƀuôn prŏng Pleiku. Đại úy Phạm Văn Hùng, Tiểu đoàn trưởng Tiểu đoàn D30, Knơ̆ng bruă Hdră kdrăp, kahan krĭng 3 brei thâo: Mŏng mlan 7 truh kơ ară anei, kñăm đru kơ alŭ wăl bi hrŏ klei kpĭ hlăm bruă bi ktlah hlăk mnuih ƀuôn sang mŏng dŭm čar kwar Dhŭng wĭt, phung knuă druh, lĭng kahan mprăp leh anôk đih đăm, mkŏ mjing hdră bi ktlah kơ 500 čô mnuih. “Hmei mprăp leh jăk anôk bruă nah gŭ, tŭ jum mnuih ƀuôn sang mŏng dŭm alŭ wăl hriê bi ktlah. Tiểu đoàn leh mbĕ nao kơ anôk mrâo, hmei pral bi kjăp, mkŏ mjing anôk dôk, đih đăm mrâo, rŏng bi leh kjăp dua bruă klam anăn jing gang mkhư̆ klei ruă tưp ệjai lehanăn bi leh dŭm hnơ̆ng čuăn, hdră kčah ngă bruă mŏng pô.

 Hluê ngă klei gĭt gai mơ̆ng kahan krĭng 5, mrâo anei, Knơ̆ng gĭt gai lĭng kahan čar Gia Lai nao bi hgŭm ksiêm dlăng leh 4 anôk ti alŭ wăl čar čiăng mkŏ mjing sang êa drao jing jai dŏng mdrao mnuih ruă Covid 19. Hluê anăn, êpul êya ruah leh Sang hră gưl krah Gia Lai ngă Sang êa drao jing jai mdrao mnuih ruă Covid 19 hnơ̆ng hdjul, hlăm Knơ̆ng gĭt gai lĭng kahan čar Gia Lai. Mbĭt hŏng bruă rơ̆ng kjăp anôk bruă nah gŭ, kdrăp mnơ̆ng, êa drao gŭn, sang êa drao lŏ mâo êpul knuă druh, mnuih mă bruă jing phung knuă druh bruă mdrao mgŭn mơ̆ng dŭm êpul êya kahan jưh dôk ti alŭ wăl čar Gia Lai.

Hŏng ai tiê ba anăp, jih jang kyua klei êđăp ênang, klei suaih pral mơ̆ng mnuih ƀuôn sang, dŭm êpul kahan mơ̆ng kahan krĭng 5 lehanăn kahan krĭng 3 mơ̆ng Phŭn bruă lĭng kahan ti čar Gia Lai dôk mâo lu bruă ngă tŭ dưn, klă sĭt jing sa hlăm dŭm êpul êya phŭn hlăm hdră gang mkhư̆ klei ruă Covid 19 ti alŭ wăl./.