VOV4.Êđê- Să Đưng Knơ̆, kdriêk Lạc Dương, čar Lâm Đồng mâo giăm 95% mnuih ƀuôn sang jing mnuih djuê biă K’Ho. Kyua dưi bi lar klei bi mguôp djuê ana, hrăm mbĭt mkŏ mkra krĭng ƀuôn sang mrâo, klei ư̆ êpa, ƀun ƀin ƀrư̆ ƀrư̆ dưi msưh kdŭn, klei hdĭp mda mnuih ƀuôn sang ƀuh klă klei đĭ kyar, thŭn leh êgao, khădah tuôm hŏng lu klei dleh dlan kyua hmăi amâo jăk mơ̆ng klei ruă tưp Covid-19, ƀiădah să Đưng K’Nơ̆ ăt dưi lŏ mâo dŭm hnơ̆ng čoh čuăn bruă duh mkra ala ƀuôn, hlăm anăn yuôm bhăn hĭn jing dưi bi leh 19/19 hnơ̆ng čoh čuăn hlăm bruă mkŏ mkra krĭng ƀuôn sang mrâo.

Truh kơ Đưng Knơ̆, kdriêk Lạc Dương, čar Lâm Đồng, hlăm dŭm hrue akŏ thŭn mrâo, bi kngăr mơh ƀuh klei bi mlih pral êdi hlăm sa boh să dôk hlăm krah kmrơ̆ng knŭk kna mkuôm Bidup – Aduôn Čư̆ Jŭ. Dŭm boh sang hŏng kyâo hơăi mang hlăk anăn ară anei mâo rŭ mdơ̆ng leh sang prŏng kjăp siam, dŭn bĭt êlan êlâo dih kblŭt kdlăt, êbhơr ksak êlâo dih ară anei mâo tuh leh hŏng betong siam b’blăk, mâo êlan klei pui kmlă, sang hră mơar, sang êa drao gŭn lehanăn djăp bruă kơ phung ƀuôn sang hdĭp mda mâo duh bi liê leh jăk... brei ƀuh klei hdĭp phung ƀuôn sang kơ anei mâo leh klei bi mlih, trei mđao.

Ktrâo kơ êlan betong prŏng siam đuĕ nao b’blăk hlăm krah ƀuôn Bon Niêng Ha Đê, dôk ti alŭ Knơ̆ 2, să Đưng Knơ̆ brei thâo, kyua mâo leh êlan klông jăk siam snăn klei dŭ mdiăng mnơ̆ng dhơ̆ng êrô hiu găl hĭn, phung ƀuôn sang amâo lŏ lĕ hlăm klei phung ghan mnia kpĭ ênoh ôh. Hjăn hlăm thŭn anei, kphê lŏ yuôm, anôk čhĭ hơĭt, snăn sa kdrêč mâo klei mơak mơh, tloh blei mprăp lu mta mnơ̆ng yua hlăm bruă knuă lehanăn hdĭp mda.

“Mơ̆ng ngă bruă rŭ mkra krĭng ƀuôn sang mrâo, ƀuôn sang lŏ mâo leh lu klei bi mlih, klei hdĭp mda đĭ hĭn, sang pưk jăk siam, êlan klông jăk găl. Jih jang kyua mâo Đảng, Knŭk kna mđing đru hlăm djăp mta, snăn dlăng kơ ƀuôn sang ară anei bi mlih leh êdi, klei bi mlih anăn kyua mâo bruă rŭ mkra krĭng ƀuôn sang mrâo. Lu gŏ sang ƀun kpưn đĭ tloh blei leh lu mta mnơ̆ng yua hlăm bruă duah ƀơ̆ng, blei êdâo mă bruă knuă lehanăn dŭ kphê. Phung ƀuôn sang kơ anei thâo duh ƀơ̆ng hĭn leh, thâo dlăng kriê wiê ênăk mnơ̆ng pla jăk hĭn, lehanăn klei hdĭp mda đĭ hĭn leh hŏng êlâo."

Êngao 980 ha lăn pla mjing kphê jing phŭn, să Đưng Knơ̆ kčưm mâo dŭm anôk pla mjing djam mtam, mnga hŏng hdră mrâo mrang, pla mjing ana boh kroh, lehanăn rông mnơ̆ng. Êbeh 80% ênoh gŏ êsei mâo leh ênoh dưi ba wĭt hơĭt, wăt hlăm bruă tŭ mă phăn jao răng mgang dliê, hŏng ênhă jih jang truh 11 êbâo 770 ha. Êjai anăn lu anôk hnơ̆ng mâo ba wĭt trŭn hrŏ kyua klei ruă tưp Covid 19, snăn Đưng Knơ̆ ăt mâo ênoh ba wĭt tĭng grăp čô mnuih mơ̆ng 41 - 43 êklăk prăk/thŭn. Hnơ̆ng ênoh gŏ êsei ƀun hrŏ leh mơh, ară anei knŏng adôk mă 3,2%.

Tui si R Ông Ha Bang, ti alŭ Đưng Knơ̆ 1, mâo hĕ boh tŭ dưn anei jing mơ̆ng sa klei gĭr jih ai tiê mơ̆ng phung knuă druh, lehanăn phung ƀuôn sang, hlăm anăn mâo klei Đảng, Knŭk kna duh bi liê leh hlăm djăp mta, mjing boh kdrŭt đru kơ phung ƀuôn sang bi mlih klei mĭn hlăm klei duah ƀơ̆ng, hlăm klei hdĭp mda, kpưn đĭ rŭ mdơ̆ng sa klei hdĭp trei mđao mơak mñai, R Ông Ha Bang lač:

“Êlâo adih lu snăk gŏ êsei ƀun, ară anei hrŏ leh lu êdi, klei hdĭp mda phung ƀuôn sang hlăk dơ̆ng đĭ kyar. Êlan klông, sang êa drao, pui kmlă mâo leh knŭk kna duh bi liê djăp ênŭm, krĭng ƀuôn sang hlăm să mâo leh klei bi mlih. Phung ƀuôn sang kơ anei hơ̆k mơak, sa ai, bi đru lehanăn jih ai tiê hgŭm jăk hlăm bruă mkŏ mkra krĭng ƀuôn sang mrâo, boh nik nak leh mâo êlan klông siam, boh mnga phung ƀuôn sang mâo amâo lŏ lĕ hlăm klei phung ghan mnia kpĭ ênoh ôh, phung ƀuôn sang mơak snăk”.

Mơ̆ng sa boh să ƀun ƀin hĭn hlăm kdriêk Lạc Dương, lu phung ƀuôn sang djuê ana K’ho. Leh 8 thŭn mkŏ mkra krĭng ƀuôn sang mrâo, truh knhal jih thŭn 2021, Đưng Knơ̆ kpưn đĭ bi leh ênŭm 19/19 čoh čuăn. Thân Văn Hữu, Khua bruă Đảng, Khua să Đưng Knơ̆ brei thâo, čiăng rơ̆ng kơ klei hdĭp mda ala ƀuôn hlăm să đĭ kyar kjăp, phung ƀuôn sang hơĭt ai tiê duh ƀơ̆ng, hlăm klei lŏ rŭ mkra mđĭ hĭng ênoh čuăn krĭng ƀuôn sang mrâo, alŭ wăl hlăk ktuh êyuh lu hdră čiăng đru kơ phung ƀuôn sang mđĭ hĭn ênoh mâo ba wĭt hlăm sa ênhă lăn pla mjing. Mbĭt hŏng anăn, klei mđĭ kyar dŭm bruă mâo leh mơ̆ng đưm pioh kơ bruă hiu čhưn ênguê ăt mâo duh mĭn mơh:

"Hmei hlăk brei phung ƀuôn sang nga hră mơar kñăm čiăng đru pla mjing ana boh kroh, lehanăn lŏ dơ̆ng duh mrâo kphê hŏng kjeh jăk, čiăng kơ phung ƀuôn sang mâo hnơ̆ng hrui wĭt hơĭt hĭn. Hmei dôk bi mguôp hŏng sang hră Gưl Prŏng Đà Lạt čiăng ngă dŭm bruă lŏ hma, đru hdră mă bruă, ba yua kdrăp mrâo kơ phung ƀuôn sang tui hriăm duh mkra pla mjing, rông mnơ̆ng. Hmei lŏ hgŭm hŏng Đang kmrơ̆ng knŭk kna mkuôm pioh mđĭ kyar bruă hiu čhưn ênguê hlăm yang ƀuôn čiăng kơ phung ƀuôn sang dưi čhĭ mnia bruă mơ̆ng kngan pô ngă msĕ si mnơ̆ng pơ̆k mñam, kpiê čeh, mđĭ kyar bruă hiu čhưn ênguê, phung ƀuôn sang mâo hdră êlan duh ƀơ̆ng jăk hĭn hlăm wưng kơ anăp”.

Hŏng dŭm boh tŭ dưn leh mâo, mbĭt hŏng dŭm hdră êlan jăk tui si Thân Văn Hữu, Khua bruă Đảng, Khua să Đưng Knơ̆ mrâo leh lač, sĭt nik klei hdĭp phung ƀuôn sang mnuih djuê ana K’ho tinei srăng đĭ kyar hĭn yan mơ̆ng yan mnga kơ anăp anei./.

Pô mblang: Y-Khem Niê