VOV4.Êđê - Khădah klei hdĭp gŏ sang ăt dôk lu klei dleh dlan, suaĭ êmăn ƀiădah êpul đru kơ mnuih knap mñai mơ̆ng mnuih leh mdei mă bruă knŭk kna, mnuih khua thŭn ti wăl krah Êa Sup, kdriêk Êa Sup, čar Dak Lak mâo leh bruă ngă klă sĭt hlăm hdră gang mkhư̆ klei ruă Covid 19. Mơ̆ng bruă ngă diñu, klei hgŭm mguôp dưi ksŭl mbŭ, klei thâo săng, klei gĭr hlăm hdră gang mkhư̆ klei ruă tưp hlăm êpul êya dưi mđĭ hĭn.

Aduôn Đào Thị Màu ti wăl krah Ea Suop, kdriêk Ea Suop, čar Dak Lak yăl dliê hŏng kâo sơnei, hlăm dŭm kdrăp hâo hưn klei mrâo, thâo mnuih ƀuôn sang dôk hlăm anôk mâo klei ruă tưp tuôm hŏng lu klei dleh dlan, kƀah mnơ̆ng dhơ̆ng, êpul ba anăp gang mkhư̆ klei ruă tưp ăt suăi êmăn êdi. Aduôn nao đru iêo mthưr kơ dŭm gŏ sang thâo mâo ƀiă, dŭm gŏ sang ngă bruă mnia mblei điêt hlăm alŭ wăl đru mguôp prăk, braih, dŭm mta mnơ̆ng ƀơ̆ng čiăng kơ êpul čŏng ngă bruă nao ba truh kơ dŭm gŏ sang dôk hŏng klei dlan hlăm anôk bi ktlah, lehanăn dŭm čô hruê mlam dôk ngă bruă hlăm dŭm anôk gak răng.

Aduôn Màu nao mtrŭt mjhar na nao kơ anak čô, sang riêng gah ngă jăk 5 klei mtă mơ̆ng phŭn bruă mdrao mgŭn: “Min kơ lăn čar dôk găn klei ruă tưp, hlăm êpul ba anăp jing Nai mdrao, aê mdrao, dŭm čô kahan ksiêm, lĭng kahan. Kâo mâo ai tiê, čiăng mđup brei kơ diñu dŭm giêt êa, huôm ƀung hdang krô amâodah dŭm giêt êa mmih čiăng mđĭ ai diñu. Kâo amâo mĭn mta anei klei dih ôh, knŏng čiăng ngă lu bruă bi đru kơ anak aneh dŭm čô ngă bruă ba anăp čiăng kơ diñu hơĭt êjai ngă bruă.”

Phan Ba jing sa čô knuă druh leh mdei bruă mâo leh 5 thŭn hŏng anei. Phan Ba lač sơnei: “Đảng viên nao êlâo - ƀuôn sang nao êdei”. Amâo djŏ knŏng gưl bluh đĭ klei ruă tưp Covid-19 anei, ƀiădah êlâo kơ anăn, êpul phung khua asei ngă bruă bi đru ti wăl krah Ea Suop ăt dưi iêo mthưr bi mguôp čiăng rŭ mdơ̆ng 2 boh sang kơ dŭm gŏ sang dôk mâo klei dleh dlan ti să knông lăn lehanăn sa boh sang kơ sa čô mnuih djuê ƀiă hlăm wăl krah.

Dŭm hruê êgao, Phan Ba mâo uêñ ôh kơ adiê hjan mđiă, nao ba braih, mnơ̆ng ƀơ̆ng, êa mnăm truh kơ dŭm anôk bi ktlah, dŭm anôk gak răng. “Ti anăp klei dleh dưi ksiêm dlăng mơ̆ng klei ruă tưp, thâo săng klă boh klei “Sa kpăt êjai êpa msĕ hŏng sa hruh leh trei” kyua anăn ayŏng amai adei hmei mkŏ mjing dŭm êpul ngă bruă đru. Mơ̆ng bruă iêo mthưr ai dưi mơ̆ng alŭ wăl ăt msĕ hŏng ai dưi êngao alŭ wăl čiăng đru kơ dŭm gŏ sang dôk hlăm klei dleh dlan hlăm kdriêk lehanăn dŭm anôk gak răng, ksiêm dlăng klei ruă tưp krĭng knông lăn truh kơ dŭm êpul êya alŭ wăl phŭn lehanăn dŭm anôk bi ktah hlăm alŭ wăl. Mơ̆ng anăn hmei ƀuh mâo klei mđao hlăm ai tiê kyua dưi đru sa kdrêč kơ dŭm čô ƀun ƀin, mnuih dleh dlan hlăm wưng klei ruă tưp msĕ sơnei.”

Wăl krah Ea Suop mâo leh sa hdră ngă bruă jăk hlăm bruă bi ktlah dŭm čô mnuih mă bruă mrâo wĭt mơ̆ng ƀuôn prŏng Hồ Chí Minh lehanăn dŭm čar krĭng dhŭng. Anăn jing 4 truh kơ 5 gŏ sang srăng mjing sa êpul, diñu jang sa boh sang lehanăn brei kơ phung mrâo wĭt anăn dôk sa anôk lehanăn bi ktlah. Kyua klei ngă bruă anei dŭm čô jing F0 dưi hmao ƀuh hnưm lehanăn amâo ngă tưp lar hlăm yang ƀuôn ôh. Dŭm čô khua asei hlăm wăl krah Ea Suop ăt mâo klei bi mguôp klă klơ̆ng hlăm bruă gang mkhư̆ klei ruă tưp hlăm alŭ wăl.

Nguyễn Thanh Bình khua kiă kriê bruă sang čư̆ êa wăl krah Ea Suop čih yap: “Ayŏng Phan Ba - pô bi ala kơ êpul mnuih khua asei hlăm kdriêk, hruê mmông leh êgao mâo na nao klei blŭ hrăm hŏng gưl bruă Đảng nah gŭ, bruă sang čư̆ êa alŭ wăl, mbĭt hŏng dŭm ai tiê, dŭm klei khăp. Mrâo anei bi mguôp mbĭt hŏng gưl bruă Đảng nah gŭ rŭ mdơ̆ng sa boh sang bi mguôp hlăm ƀuôn. Boh nĭk hruê mmông giăm anei ayŏng Phan Ba mâo ai tiê kmah, klei khăp, ayŏng nao iêo mthưr dŭm gŏ sang mnia mblei điêt hlăm alŭ wăl, hŏng klei khăp, kah mnơ̆ng dhơ̆ng đru bi mguôp kơ dŭm alŭ wăl čiăng bi mdul ƀiă dŭm klei dleh dlan hlăm dŭm anôk mâo klei ruă tưp”./.