VOV4.Êđê- K’iăng khua phŭn bruă mdrao mgŭn Nguyễn Trường Sơn mrâo brei ƀuôn prŏng Hồ Chí Minh ngă klei bi hmô bi ktlah F0 ti sang, mbĭt hŏng klei bi ktlah F1. Msĕ si, klei bi ktlah F1, bi hŏng dŭm krĭng dôk hlăm klei huĭ hyưt prŏng, amâo mâo djăp klei găl ngă bruă tui si phŭn bruă mdrao mgŭn kñăm kơ bruă bi ktlah ti sang, (mâo F0 ti sang, hlăm krĭng phŭn anôk mâo klei ruă tưp msĕ si hlăm wăl anôk jưh dôk, alŭ wăl mnuih dleh dlan, alŭ wăl anôk lu mnuih hdĭp) snăn bi mlih jing klei bi ktlah sa anôk, mkă dlăng kman RT-PCR hrue tal 7 hrô kơ hrue tal 14 msĕ si êlâo, tơdah amâo mâo ƀuh kman ôh snăn ba bi kltah hlăm sang pô. Kơ klei bi ktlah, mdrao mgŭn F0: Hŏng phung amâo mâo klei bi knăl ƀuh kơ klei ruă hlăk dôk mdrao ti sang êa drao, tơdah mkă dlăng hŏng RT-PCR hrue tal 10 kăn ƀuh kman, amâodah mâo kman ti hnơ̆ng ƀiă, jing dôk hlăm ênoh amâo lŏ dưi bi mtưp, snăn brei wĭt bi ktlah ti sang, tơdah mâo djăp klei găl, dưi gang mkhư̆ klei tưp lar. Hluê ngă klei bi hmô bi ktlah ti sang hŏng F0 phung mâo klei ruă amâo mâo ƀuh klei bi knăl. Knơ̆ng bruă mdrao mgŭn ƀuôn prŏng Hồ Chí Minh mñă, bruă mdrao mgŭn alŭ wăl bi mkŏ mjing êpul kăp ksiêm dlăng klei suaih pral hlăm grăp hrue hŏng phung F0 bi ktlah ti sang, mkŏ mjing êlan đĭng blŭ mjêč kăp bi hưn mnuih ruă mâo klei bi knăl amâo mâo jăk, pral ba mtam kơ sang êa drao./.

Pô mblang: Y-Khem Niê