VOV4.Êđê- Mơ̆ng hrue 27/6 truh kơ ară anei, ti sang êa drao jing jai mrô 1 ƀuôn prŏng Hồ Chí Minh mâo leh êbeh 1.700 čô mnuih ruă Covid 19 mâo kbiă leh mơ̆ng sang êa drao. Anei jing phung leh mkă dlăng amâo lŏ ƀuh kman ôh, amâodah kman ti hnơ̆ng êdu, amâo lŏ dưi bi mtưp ôh. Sang êa drao jing jai mrô 1 mâo truh 4 êbâo 500 boh jhưng đih, mkŏ mjing ti sang dôk phung hriăm gưl prŏng bruă lĭng kahan sang hră gưl prŏng ala čar ƀuôn prŏng Hồ Chí Minh, dưi ngă bruă mơ̆ng hrue 26/6. Ti anei, dôk mdrao truh 4.423 čô mnuih ruă jing F0.

Ti anei mâo bruă klam mdrao jih mnuih mâo klei ruă lehanăn phung dôk hlăm anôk bi ktlah jing F1 hlŏng jing F0. Mơ̆ng hrue 13/7, Knơ̆ng bruă mdrao mgŭn ƀuôn prŏng Hồ Chí Minh ngă leh klei bi hrŏ hrue mông mdrao mgŭn kơ F0 jing phung amâo mâo klei bi knăl klă hlăm klei ruă. Mơ̆ng anăn, F0 leh mkă hŏng RT-PCR hrue tal 10 ƀuh jing amâo mâo kman ôh, amâodah mâo mơh kman ti hnơ̆ng êdu snăn dưi ba bi ktlah ti sang pô, tơdah mâo djăp klei găl, dưi mdrơ̆ng hŏng klei ruă tưp./.

Pô mblang: Y-Khem Niê