VOV4.Êđê- Hruê mbruê 9/6, ti Hà Nội, phŭn bruă kahan ksiêm mkŏ mjing leh klei kƀĭn êpul khua gĭt gai mkŏ mjing klei kriê pioh ala čar kơ mnuih ƀuôn sang lehanăn hdră êlan mkŏ mkra, brei lehanăn ksiêm dlăng hră kak asei. Đại tướng Tô Lâm, khua phŭn bruă kđi čar, khua phŭn bruă kahan ksiêm, khua gĭt gai klei kƀĭn lač, tĭng truh kơ hruê 7/6, mâo leh êbeh 35 êklăk čô mnuih ƀuôn sang mâo leh mrô bi mklă grăp asei. Mĭn tĭng truh ti hruê 18/6, phŭn bruă kahan ksiêm srăng ngă bruă brei kơ hlăm brô 90% mrô bi mklă pô kơ mnuih ƀuôn sang hlăm ala čar. Khua phŭn bruă Tô Lâm mñă klă, kahan ksiêm dŭm anôk bruă, alŭ wăl, amâo dưi ngă ngơi mang, lač jing jăk leh bruă pô ngă, ƀiădah srăng mâo klei gĭr dưi bi leh bruă klam pô, ti anăp jing dŭm bruă mjêč mơ̆ng ară anei truh kơ hruê 1/7, lehanăn dŭm bruă leh êgao kơ hruê 1/7. Mbĭt hŏng anăn lŏ mtă kơ anôk bruă kahan ksiêm bruă knŭk kna kơ klei êđăp ênang yang ƀuôn lŏ dơ̆ng mtrŭt mhjar kahan ksiêm hlăm dŭm alŭ wăl ngă bruă bi klă klei čih pioh, djŏ hlăm klei čih yap mâo leh čiăng dưi brei mrô bi klă grăp asei kơ mnuih ƀuôn sang hlăm hruê 18/6/2021 tui si klei bhiăn tăp klei čih yap djŏ srăng brei mrô bi klă grăp asei truh kơ năn.

Pô mblang: Y-Ƀel Êban