VOV4.Êđê- Tui si klei ksiêm yap mơ̆ng Phŭn bruă sang hră mơar, truh 5h tlam hrue 5/9, mâo leh êbeh 358 êbâo čô hđeh bi lông mâo klei hmăng hmưi dưi hrŏng ruah, truh êbeh 45%, hlăm ênoh jih jang hđeh bi lông akâo mŭt sang hră Gưl prŏng hŏng hdră ksiêm dlăng hnơ̆ng tŭ dưn klei hriăm gưl 3, đĭ hĭn êbeh 3% mkă hŏng thŭn dih. Ênoh hmăng hmưi kơ klei hrŏng ruah mâo tĭng mkă êbeh 3 êklăk 800 êbâo, jing kah knar grăp čô hđeh bi lông ngă hră mơar truh 4,8 klei hmăng hmưi mkăp mâo, mđĭ thiăm êbeh 84 êbâo klei hmăng hmưi, tĭng kah knar grăp čô hđeh ngă hră mơar bi lông lŏ čih thiăm klei hmăng hmưi jing 4,9 klei. Snăn Phŭn bruă sang hră mơar ăt brei thâo, mâo êbeh 78 êbâo čô hđeh bi lông mâo tŭ mă leh klei bi klă dưi mŭt hriăm tui si dŭm boh sang hră hưn leh, đĭ hlăm brô 5 êbâo mkă hŏng thŭn dih. Tui si hdră hrŏng ruah mơ̆ng Phŭn bruă sang hră mơar, mơ̆ng hrue 13/9 truh 5h tlam hrue 15/9 jih jang djăp boh sang hră ngă klei lŏ hrŏng ruah tui si gưl 1. Êlâo kơ 5h tlam hrue 16/9, jih jang dŭm boh sang hră srăng hưn ênoh hrŏng ruah gưl tal êlâo./.

Pô mblang: Y-Khem Niê