VOV4.Êđê - Mrâo êgao, dŭm êbâo čô mnuih jing mnuih mă bruă mơ̆ng dŭm čar Lăn Dap Kngư dôk hdĭp leh anăn mă bruă ti ƀuôn prŏng Hồ Chí Minh leh anăn dŭm čar nah Dhŭng bi wĭt ti ƀuôn sang ñĕ kơ klei ruă tưp hŏng êdeh êdâo pô. Čiăng bi hrŏ klei ruă tưp lar mơ̆ng phung wĭt kơ ƀuôn sang, dŭm alŭ wăl hlăm krĭng wăl dăp êdeh, mnuih mă bruă leh anăn kdrăp mnơ̆ng čiăng đru kơ mnuih wĭt kơ pưk sang pô êđăp ênang. Sa bruă yuôm bhăn snăk leh wĭt kơ ƀuôn sang, brei grăp čô mnuih wĭt anăn ngă bi jăk dŭm hdră kčah kơ klei gang mkhư̆ klei ruă tưp čiăng rơ̆ng klei suaih pral.

Ti anăp klei kpĭ mâo lu mnuih wĭt kơ ƀuôn sang kñăm gang mkhư̆ klei ruă tưp găn s’aĭ anôk ksiêm dlăng Cai Chanh ti kdriêk Dak Rlâp čar Dak Nông, anôk bruă mdrao mgŭn kah mbha leh mnuih mă bruă lehanăn kdrăp mnơ̆ng čiăng ksiêm dlăng, bi mklă. Hà Văn Hùng, K’iăng khua Knơ̆ng bruă mdrao mgŭn čar Dak Nông, bruă ksiêm dlăng kjăp, ba bi ktlah mnuih mrâo wĭt, nao găn ti alŭ wăl čar srăng đru kơ alŭ wăl gang mkhư̆ phŭn bi mtưp klei ruă mơ̆ng tal êlâo mtam lehanăn dêč đuê̆ kơ klei lu mnuih bi kluh nao ksiêm dlăng kơ anôk bruă mdrao mgŭn hlăm hdră gang mkhư̆ klei ruă tưp ară anei: “Ti anôk gak anăn hmei srăng ksiêm dlăng hnơ̆ng hlơr asei mlei hŏng hlei pô êngoh, hlơr, mtŭk, dleh bi êwa djŏ tuôm ti anôk mâo klei ruă, mkŏ mjing hdră hưn mthâo klei suaih pral hŏng kdrăp mrâo hluê hdră bi mklă mta QR-Code. Hmei ăt mkŏ mjing hdră ksiêm dlăng mnuih nao/wĭt kơ Dak Nông brei mâo hră bi mklă amâo mâo kman klei ruă Covid 19. Boh nik, hlei pô nao/wĭt kơ Dak Nông ka ksiêm dlăng kman snăn phung anăn hmei srăng ksiêm dlăng kman pral kñăm pral hmao ƀuh kman tơdah mâo”.

Dôk ba tian mlan tal 7, ung mô̆ amai Hoàng Thị Nhung, să Čư̆ Êa Wy, kdriêk Êa Hleo, čar Dak Lak nao mă bruă ti Bình Dương iêu leh đĭng blŭ hưn hŏng gŏ sang, mprăp djăp ênŭm mnơ̆ng mnuă kơ pưk ti hma, čiăng kơ dua ung mô̆ ñu bi ktlah tinăn leh wĭt kơ ƀuôn sang.“Wĭt ti sang pô ƀuh h’ĭt ai tiê hĭn, ƀiădah dlăng ktuê êlan ăt huĭ mơh kyuadah pô ksiêm dlăng ti adih leh, wĭt tinei ară anei lŏ ksiêm dlăng ƀuh gơ̆ h’ĭt mơh ai tiê. Wĭt truh ti sang, kâo hlŏng nao mtam kơ anôk bruă mdrao mgŭn hưn mthâo klei suaih pral lehanăn 2 ung mô̆ kâo hlŏng nao dôk ti hma kbưi hŏng sang 4km”.

Bi amai H’Mara Niê, ti să Hòa Phong, kdriêk Krông Bông ăt đĭ êdeh pô mơ̆ng Bình Phước wĭt truh ti sang, leh hmư̆ amĭ ñu hưn ti să mâo leh anôk bi ktlah mklin sa anôk kơ mnuih mrâo wĭt mơ̆ng krĭng mâo klei ruă tưp. Klei ktrŏ lehanăn huĭ pô srăng ba kman klei ruă bi mtưp kơ gŏ sang, kơ ƀuôn sang dul ƀiă mơh hlăk kâo dưi nao mŭt hlăm anôk bi ktlah mklin sa anôk mơ̆ng să. H’Mara Niê brei thâo:“Kâo m’ak êdi dưi truh tinei. Kâo nao dôk bi ktlah ti sang hră hlăm să mtam, amâo jhŏng wĭt ti sang ôh. Amĭ kâo ăt iêu đĭng blŭ mơh, wĭt hlŏng nao bi ktlah mtam yơh, amâo lŏ weh ti sang ôh.

Bùi Ngọc Hoàng, Khua bruă Đoàn kdriêk Êa Hleo, čar Dak Lak brei thâo: Hluê ngă Asăp mtrŭn hruê 31/7 mơ̆ng Khua knŭk kna, Anôk gĭt gai hdră gang mkhư̆ klei ruă Covid 19 kdriêk Êa Hleo mkŏ mjing leh Klei bi kƀĭn čiăng pŏk hdră drông mnuih ƀuôn sang wĭt. Hluê anăn, kdriêk mkŏ mjing leh 3 anôk bi ktlah mklin sa anôk lehanăn ba nao 9 boh êdeh nao ti Sang hră gưl 3 čiêm rông hđeh mnuih djuê ƀiă Nơ Trang Lơng – anôk mnuih ƀuôn sang wĭt kơ Dak Lak srăng bi kƀĭn tinei kñăm ksiêm dlăng kman pral êlâo kơ wĭt ti alŭ wăl mdê mdê. Hdră mơ̆ng bruă mdrao mgŭn hlăm wưng bi ktlah mâo leh Kdriêk čih mkra klă klơ̆ng. “Anôk bi ktlah mơ̆ng kdriêk dưi tŭ jum hlăm brô giăm 400 čô mnuih ti 3 anôk, tal sa jing Anôk bruă mdrao mgŭn kdriêk, tal 2 jing Anôk bruă mtô bi hriăm bruă mơ̆ng kdriêk lehanăn tal 3 jing Sang hră čiêm rông hđeh mnuih djuê ƀiă mơ̆ng kdriêk. Anôk gĭt gai kdriêk srăng mđing kriê dlăng mơ̆ng A truh kơ Z, êlâo hĭn jing rơ̆ng kơ jih jang mnuih h’ĭt ai tiê bi ktlah lehanăn hluê ngă kjăp klei kčah mtrŭn kơ hdră gang mkhư̆ klei ruă tưp.

Mơ̆ng tlam hruê 29 truh kơ čang rang aguah hruê 30/7/2021, giăm 900 čô mnuih mă bruă ti Đồng Nai đĭ êdeh ph’phŭt wĭt leh kơ Dak Lak. Mnuih mâo klei čiăng wĭt nao bi mklă hŏng anôk bruă djŏ tuôm ti Đồng Nai lehanăn knŏng dưi wĭt tơdah dưi ksiêm mkă dlăng amâo mâo klei ruă Covid 19 kñăm amâo lŏ dôk guôn ksiêm dlăng ôh anôk gak răng. Leh kơnăn, kahan ksiêm êlan klông lehanăn dŭm êpul djŏ tuôm mâo êpul ksiêm dlăng klei êđăp ênang, êpul nai aê mdrao mơ̆ng čar Đồng Nai mkŏ mjing leh sa êpul nao mgrông mbĭt ti ktuê êlan giăm 400km. Čar Đồng Nai ăt mâo sa boh êdeh mdiăng mnơ̆ng mkăp mnơ̆ng ƀơ̆ng huă, êa mnăm kơ jih jang mnuih hlăm ktuê êlan wĭt kơ ƀuôn sang.

Leh 3 mlam pŏk hdră tŭ drông mnuih ƀuôn sang wĭt kơ ƀuôn sang mơ̆ng dŭm čar kwar Dhŭng mâo leh êbeh 3 êbâo čô wĭt ti Dak Lak. Kñăm rơ̆ng kơ hdră gang mkhư̆ klei ruă tưp, êpul djŏ tuôm krŏng leh ală jih hruê mlam čiăng ngă hră m’ar djŏ tuôm msĕ si hră hâo hưn, ksiêm dlăng kman pral kơ mnuih ƀuôn sang. Mơ̆ng anăn, hmao ƀuh leh hlăm brô 20 čô djŏ kman SARS- CoV -2, hlăm anăn mâo 7 čô boh tŭ RT - PCR djŏ kman, dŭm adôk lŏ dôk guôn boh tŭ bi mklă mơ̆ng kdrăp RT –PCR. Dŭm čô mnuih dưi ksiêm dlăng pral djŏ kman dưi ba bi ktlah êjai kñăm dôk guôn boh tŭ RT –PCR, mnuih amâo ƀuh kman brei wĭt kơ alŭ wăl brei nao hưn mthâo hŏng anôk bruă mdrao mgŭn alŭ wăl lehanăn hluê ngă hdră bi ktlah djŏ si klei kčah mtrŭn. Lê Phúc, K’iăng khua anôk bruă ksiêm dlăng klei ruă tưp čar Dak Lak brei thâo: Leh Khua knŭk kna bi mklă Asăp mtrŭn tlam hruê 31-7, snăn mlam 1/8, leh mnuih ƀuôn sang truh ti anôk bi kčah čiăng ksiêm dlăng kman pral, lu kdriêk mkăp leh êdeh êdâo nao mdiăng mnuih ƀuôn sang wĭt lehanăn hluê ngă hdră bi ktlah djŏ guôp. Klei anei srăng đru kơ alŭ wăl ksiêm dlăng klei ruă tưp tŭ dưn hĭn. “Dŭm alŭ wăl hluê ngă leh hdră bi ktlah ti kdriêk, hmei tĭng knăl hdră anei srăng rơ̆ng kjăp klei êđăp ênang hĭn kyua bi ktlah sa anôk mâo dŭm mta klei mnuih ƀuôn sang bi ktlah ti sang amâo dưi hluê ngă ôh. Bi ktlah mklin sa anôk srăng dưi hluê ngă hdră ksiêm dlăng PCR lehanăn tơ hmao ƀuh kman klei ruă snăn dôk leh hlăm krĭng bi ktlah mklin sa anôk gơ̆ amâo đĭ lar hlăm êpul êya ôh. Hŏng mnuih bi ktlah ti sang snăn brei mâo djăp klei găl, ăt hluê ngă hdră ksiêm dlăng klei suaih pral lehanăn mă mta ksiêm dlăng ti sang kñăm rơ̆ng tơ hmao ƀuh kman klei ruă brei mâo hdră msir ba bi ktlah djŏ guôp.

Truh kơ ară anei, jih 15 kdriêk, wăl krah, ƀuôn prŏng hlăm čar Dak Lak mâo s’aĭ mnuih ruă Covid 19. Păt čiăng jih phung anei djŏ tuôm kơ krĭng dôk bluh mâo klei ruă lu jing ƀuôn prŏng Hồ Chí Minh lehanăn dŭm čar kwar Dhŭng. Ti anăp klei mâo dleh dưi ksiêm dlăng mơ̆ng klei ruă tưp, klei lu mâo êpul mnuih kluh wĭt kơ ƀuôn sang pô kñăm gang mkhư̆ klei ruă tưp srăng dôk mâo lu. Dŭm hdră tŭ drông mnuih wĭt kơ ƀuôn sang pô dôk mâo čar Dak Lak hluê ngă đru leh kơ jih jang mnuih h’ĭt ai tiê hĭn lehanăn bi hrŏ klei tưp lar mơ̆ng klei ruă hlăm êpul êya yang ƀuôn./.