VOV4.Êđê -  Hruê 16/6, ti sang bi kƀĭn bruă kƀĭn ala, êpul bi ala bruă kƀĭn ala Việt Nam mơ̆ng Vũ Hải Hà, khua hlăm êpul bruă Đảng gưl dlông, khua kiă kriê dhar bruă kƀĭn ala, khua kiă kriê dhar bruă hŏng tač êngao ngă khua êpul nao hgŭm hlăm klei kƀĭn trông êpul đru kčĕ mơ̆ng êpul hgŭm dŭm ala čar Ngŏ dhŭng Asi tal 12 (AIPA Caucus 12) tui hluê êlan online. Êpul bi ala bruă kƀĭn ala Việt Nam hŏng dŭm ala čar kah mbha leh klei mrâo, klei thâo hlăm bruă mă hŏng dŭm ƀĭng hgŭm hlăm AIPA, boh nĭk jing dŭm boh klei hlăm alŭ wăl, tar rŏng lăn dôk găn klei dleh dlan hlăm bruă ksiêm dlăng klei ruă tưp Covid-19 lehanăn mgaih msir, mđĭ kyar bruă duh mkra, mkŏ mjing dŭm klei êrô êbat hŏng dŭm čô khua êmua dŭm ala čar ASEAN. Bi êdah klei čŏng ngă mơ̆ng pô, mprăp klei bi mguôp kyua klei mgaih msir bruă duh mkra, mđĭ kyar bruă duh mkra mtah lehanăn mdrŏng sah mơ̆ng ASEAN, kyua klei jăk kơ mnuih ƀuôn sang hlăm ASEAN. Bi ruĕ klei kƀĭn trông, dŭm čô bi ala dưi ksiêm dlăng leh klei hưn mdah mơ̆ng êpul đru kčĕ mơ̆ng êpul hgŭm dŭm ala čar ngŏ dhŭng Asi tal 12 lehanăn dŭm anôk, hruê mmông mkŏ mjing klei đru kčĕ mơ̆ng êpul anei tal 13 ti ala čar Thailand.