VOV4.Êđê- Hruê mbruê (1/6), ti Hà Nội khua kiă kriê phŭn bruă kahan ksiêm mâo leh klei kƀĭn trực tuyến hŏng dŭm êpul kahan ksiêm ti đa đa anôk bruă, alŭ wăl kơ bruă ksiêm dlăng, tŭ ư dŭm hdră êlan gang mkhư̆ klei ruă tưp Covid-19 hlăm êpul êya kahan ksiêm. Ti anăp klei ruă tưp Covid-19 ăt dôk dleh dưi ksiêm dlăng hlăm kluôm tar ala čar. Phŭn bruă kahan ksiêm ngă leh hŏng klei mjêč dŭm hdră êlan gang mkhư̆ klei ruă tưp Covid-19, ngă bruă hưn mthâo bruă mdrao mgŭn lehanăn ngă jăk dŭm klei bhiăn bi ktlah mbĭt, bi ktlah ti sang čiăng gang mkhư̆ klei ruă tưp. Mđĭ hĭn bruă gang mkhư̆ klei ruă tưp hlăm dŭm anôk bruă mdrao mgŭn mơ̆ng êpul kahan ksiêm, mkŏ mjing klei tlŏ mgang vaccine kơ êpul kahan ksiêm dŭm anôk bruă, alŭ wăl lŏ ngă mjêč klei tui duah dŭm čô mnuih djŏ tuôm hŏng dŭm čô mnuih ruă hlăm yang ƀuôn, rơ̆ng mâo klei êđăp ênang hlăm dŭm anôk ksiêm dlăng, anôk bi ktlah, anôk bi ktlah mbĭt, sang mdrao mgŭn êjai hlăm alŭ wăl.

Pô mblang: H’Nêč Êñuôl