VOV4.Êđê- Mlan êdam êra thŭn anei, êpul êdam êra Anôk bruă pui kmlă čar Dak Lak hluê ngă leh lu mta bruă kyua klei hdĭp êpul êya yang ƀuôn, msĕ si mkŏ mkra dŭm mta bruă bi guh mngač êlan klông krĭng ƀuôn sang, mđup brei prăk đru hriăm hră “Đru mđĭ ai ktuê êlan kbưi” kơ phung hđeh ƀun găn klei dleh kriăng hriăm. Dŭm bruă ngă jăk siam kyua êpul êya anei hlăk ƀrư̆ hruê ƀrư̆ lar bra, mâo leh lu klei hgŭm kngan bi đru mơ̆ng phung êdam êra ti dŭm anôk bruă, alŭ wăl hlăm čar Dak Lak.

Ƀri kơ klei bi hdơr hruê mkŏ mjing êpul hđeh êdam êra Cộng sản Hồ Chí Minh hruê 26/3 leh êgao, mâo dŭm êtuh čô hđeh sang hră ti sang hră gưl sa Nguyễn Đức Cảnh, să Ea Ktur, kdriêk Cư Kuin, mơak mñai nao hlăm hdră hâo hưn klei êđăp ênang hlăm klei yua pui kmlă lehanăn klei “đru ai hlăm êlan kbưi” mơ̆ng knơ̆ng bruă pui kmlă Dak Lak mkŏ mjing. Ti nei dưi mđup brei 20 hnư mnơ̆ng dhơ̆ng mâo hlăm ênoh 10 êklăk prăk kơ dŭm čô hđeh knap mñai mâo klei gĭr hlăm klei hriăm hră mơar. Lehnăn boh nĭk dưi brei prăk đru hriăm hră mơar hŏng ênoh 25,2 êklăk prăk kơ adei  H’Mrin Byã, hđeh sang hră mnuih Êđê, dôk hriăm adŭ 2, mâo klei hdĭp dleh dlan kyua êrĭt êrin amĭ ama. Klei đru anei srăng đru kơ adei hlăm klei hriăm hră mơar truh kơ hriăm jih sang hră gưl 2. Êjai tŭ mă prăk đru anei, adei H’Mrin Byã mgei ai tiê leh anăn lač:

Dŭm čô di neh lehanăn amiêt brei prăk đru kơ kâo, kâo mơak snăk, kâo srăng gĭr čiăng mâo klei thâo hlăm klei hriăm hră, čiăng mgi dih srăng jing sa čô aê êa drao.

 Phung êdam êra PC Dak Lak mđup brei prăk đru hriăm hră kơ adei H’Mrin Ƀuôn Yă êlan jih hriăm Sang hră gưl 2

Blŭ kơ hdră êlan anei, nai Nguyễn Thị Phương, khua kiă kriê sang hră gưl sa Nguyễn Đức Cảnh, să Ea Ktur, kdriêk Cư Kuin, lač:

Kâo ƀuh bruă ngă mđup brei prăk đru hlăm klei nao sang hră kơ phung hđeh mâo klei hdĭp dleh dlan jing hdră êlan mâo boh tŭ dưn yuôm bhăn, dưi đru phung hđeh mdul kơ klei knăp mñai lehanăn đru brei klei hriăm hră jăk hlăm sang hră, đru kơ diñu thâo khăp kơ ƀĭng găp, thâo khăp kơ anak mnuih.

Ayŏng Hoàng Xuân Tứ k’iăng khua bruă Đoàn ti knơ̆ng bruă pui kmlă Dak Lak brei thâo, anei jing tal êlâo hĭn anôk bruă mâo klei đru prăk hlăm klei nao sang hră mơar “đru ai hlăm êlan kbưi” hŏng klei hmăng hmưi čiăng đru kơ phung hđeh sang hră knap mñai mâo klei myun dưi đĭ kyar.

Êpul hlăk ai ti knơ̆ng bruă hlăm dŭm thŭn leh êgao mâo leh lu hdră êlan, bruă ngă čiăng đru kơ dŭm čô hđeh sang hră mâo klei hdĭp dleh dlan, mâo klei gĭr hlăm klei hriăm hră msĕ si brei mnơ̆ng dhơ̆ng, brei prăk đru, brei êdeh wai… truh kơ thŭn anei mâo klei ktrâo êlan mơ̆ng bruă Đoàn hlăm ênuk mrâo, phung hmei mâo dŭm bruă ngă mrâo kơ dŭm bruă đru kơ yang ƀuôn, anăn jing bi mlih klei mđup brei prăk đru kơ klei hriăm hră mơar êjai, jing brei klei đru prăk hriăm hră sui thŭn. Hmei hmăng hmưi srăng dưi bi lar truh kơ jih jang mnuih mă bruă hlăm knơ̆ng bruă lehanăn dŭm êpul êya hlăm yang ƀuôn ăt srăng mâo dŭm bruă ngă, hdră êlan msĕ sơnăn.

 Phung êdam êra alŭ wăl đru hlăm hdră mtrang mngač êlan ƀuôn Pa, să Čư̆ Prao, kdriêk M’Drak

Hŏng bruă mđup brei prăk đru kơ klei hriăm hră kơ dŭm čô hđeh sang hră mâo klei hdĭp dleh dlan, ăt hlăm mlan leh êgao, êpul hlăk ai ti knơ̆ng bruă pui kmlă Dak Lak dưi mkŏ mkra leh 2 mta bruă “bi mngač hlăm êlan ƀuôn” ti ƀuôn phŭn krŭ kdơ̆ng ƀuôn Pa să Čư Prao, kdriêk M’Drăk) lehanăn alŭ 1 (să Yang Reh, kdriêk Krông Bông). 2 klei mkŏ mkra anei mâo boh taih 3,2 km, hŏng ênoh 60 êklăk prăk. Đru hlăm klei mkŏ mkra mbĭt hŏng êpul hlăk ai bruă pui kmlă lŏ mâo klei đru mơ̆ng mnuih ƀuôn sang leh anăn êpul hlăk ai hlăm alŭ wăl.

  Dŭm bruă ngă jăk siam kơ êpul êya mơ̆ng phung hlăk ai ngă bruă pui kmlă mjing klei lar bra kơ phung êdam êra dŭm bruă ti dŭm alŭ wăl ti čar Dak Lak

Tui hlue Trần Doãn Tới, k’iăng khua bruă Đoàn čar Dak Lak, dŭm bruă mă mơ̆ng êpul hlăk ai bruă pui kmlă hlăm dŭm thŭn leh êgao mâo klei bi lar truh kơ jih jang mnuih hlăm êpul hlăk ai ti čar, “bi mngač hlăm êlan ƀuôn”, “bi mngač klei đăo knang”  ba lŭ klei mlih mrâo kơ dŭm krĭng mnuih ƀuôn sang taih kbưi.

Hŏng klei đru mguôp mơ̆ng knơ̆ng bruă pui kmlă Dak Lak hlăm prăk kăk lehanăn mnuih mă bruă, mbĭt hŏng anăn jing êpul hlăk ai hlăm čar, đru leh hlăm bruă mkŏ mjing klei đăo knang kơ mnuih ƀuôn sang lehanăn phung hđeh ênuk mrâo. Hlăm dŭm hruê mmông leh êgao klei anei jing klei bi tui, bruă ngă kjăp ktang hlăm êpul hlăk ai, bi đru hlăm bruă mkŏ mkra krĭng ƀuôn sang mrâo.

Pô mblang: Y-Khem Niê