VOV4.Êđê- Hruê mbruê 31-8, Êpul kahan 3 (Phŭn bruă lĭng kahan) dôk jưh ti čar Gia Lai mkŏ mjing leh knăm trŭn ngă bruă dŭ mdiăng giăm 60 ton mnơ̆ng dhơ̆ng đru kơ mnuih ƀuôn sang krĭng mâo klei ruă tưp ti ƀuôn prŏng Hồ Chí Minh. Klă klơ̆ng, hlăm giăm 60 ton mnơ̆ng dhơ̆ng čiăng yua aguah tlam mơ̆ng Êpul kahan 3 mâo êbeh 20 ton braih, êbeh 20 ton mnơ̆ng dhơ̆ng mâo: čĭm ƀuăt, êa ksâo, êa praĭ, leh anăn giăm 19 ton djam tam, boh kroh.

Anei jing dŭm mta mnơ̆ng mâo phung knuă druh, lĭng kahan mơ̆ng dŭm anôk bruă hlăm êpul lĭng kahan 3 đru mguôp leh anăn mđĭ bruă mkra mjing hlăm wưng êgao. Jih jang ênoh mnơ̆ng dhơ̆ng anei mâo 10 boh êdeh mơ̆ng Êpul kahan 3 dŭ mdiăng leh anăn jao kơ Knơ̆ng bruă mặt trận čar kwar kdriêk Bình Chánh, ƀuôn prŏng Hồ Chí Minh mđup brei kơ mnuih ƀuôn sang tinei mdrơ̆ng hŏng klei ruă tưp.

Pô mblang: H’Zawut Ƀuôn Yă