VOV4.Êđê - Hlăm hdră tlŏ mgang ala čar gang mkhư̆ klei ruă Covid-19, Êpul kahan krĭng 5 dưi jao bruă tŭ mă, kriê pioh, dŭ mdiăng, mbha vaccin gang mkhư̆ klei ruă Covid-19 kơ 11 čar, ƀuôn prŏng krĭng kwar Krah- lăn Dap Kngư ti alŭ wăl krĭng kahan. Dŭm hruê êgao, êpul dŭ mdiăng hlăm êpul kriê dlăng hjiê vaccin Êpul kahan krĭng 5 amâo uêñ kơ hruê mlam, gĭr ba vaccin kơ dŭm alŭ wăl, rơ̆ng êđăp ênang jih hnơ̆ng. Ară anei Êpul kahan krĭng 4 tŭ mă 14 boh êdeh mdiăng vaccin, anôk bruă bi hgŭm hŏng adŭ kriê pioh, ksiêm dlăng hnơ̆ng hlơr hlăm dŭm boh êdeh bi êăt, rơ̆ng hnơ̆ng jăk hĭn. Truh ară anei, Anôk bruă nah tluôn Êpul kahan 5 dŭ mdiăng leh tŭ jing 10 ton kdrăp mnơ̆ng mdrao mgŭn leh anăn giăm 3 êtuh êbâo vaccin kơ dŭm čar, ƀuôn prŏng kwar Krah - lăn Dap Kngư. Klei gĭr mơ̆ng dŭm êpul hlăm Êpul kahan krĭng 5 đru mđĭ pral hnơ̆ng tlŏ mgang vaccin Covid-19, gĭr gang mkhư̆ klei ruă tưp.

H Zawut pô mblang