VOV4.Êđê - Čiăng mâo klei mđĭ ai dŭm čô mnuih mă bruă ba anăp bruă gang mkhư̆ klei ruă tưp Covid-19, hlăm 2 hruê 17 lehanăn 18/6, Êpul mnuih mă bruă čar Dak Lak nao čuă lehanăn mđup brei mnơ̆ng dhơ̆ng kơ dŭm anôk bruă ba anăp bruă gang mkhư̆ klei ruă tưp Covid-19 hlăm alŭ wăl.

Hlăm dŭm anôk nao čuă, êpul mâo leh klei êmuh čuă, mđĭ ai, kah mbha dŭm klei dleh dlan, klei suăi mơ̆ng dŭm čô knuă druh, lĭng kahan, êa mdrao lehanăn mnuih mă bruă mdrao mgŭn dôk tuôm êjai dôk ngă bruă klam ti sang êa drao, dŭm anôk gak răng, anôk bi ktlah. Êpul ăt čih yap lehanăn lač jăk kơ dŭm klei bi mguôp mơ̆ng dŭm čô knuă druh, lĭng kahan, êa mdrao dŭm anôk bruă dôk ngă bruă klam, hrăm mbĭt hŏng alŭ wăl ngă mâo klei tŭ dưn bruă gang mkhư̆ klei ruă tưp. Ƀri wưng anei, êpul mđup brei leh kơ grăp anôk bruă 5 êklăk prăk.