VOV4.Êđê- Aguah mbrue (24/8), Đại tướng Phan Văn Giang, Khua phŭn bruă lĭng kahan lehanăn k’iăng khua knŭk kna Lê Văn Thành nao čuă mđĭ ai phung nai aê mdrao kahan, knuă druh lĭng kahan hlăm anôk mdrơ̆ng hŏng klei ruă tưp ti sang êa drao kahan mrô 175, dŭm anôk mdrao mgŭn hlăm ƀuôn prŏng Hồ Chí Minh. Blŭ hrăm hlăm anôk mă bruă, K’iăng khua knŭk kna Lê Văn Thành bi mni kơ êpul lĭng kahan, hlăm anăn nai êa drao kahan mơ̆ng sang êa drao kahan mrô 175 ba akŏ hlăm bruă mdrơ̆ng hŏng klei ruă tưp, lehanăn mtă kơ jih jang phung knuă druh mâo klei gĭr răng mgang klei êđăp ênang, mkăp djăp mnơ̆ng ƀơ̆ng huă kơ phung ƀuôn sang hlăm krĭng mâo klei ruă tưp, bi hrŏ ƀiă hĭn klei tưp lar mơ̆ng klei ruă tưp. Ăt hlăm aguah mbrue êpul ngă bruă nao čuă mđĭ ai knuă druh lĭng kahan hlăm dŭm anôk gak răng, mdrơ̆ng hŏng klei ruă tưp, lehanăn hlăm dŭm anôk kăp mbha mnơ̆ng mnuă ti kdriêk čar Bình Tân, ƀuôn prŏng Hồ Chí Minh./.

Pô mblang: Y-Khem Niê