VOV4.Êđê- Aguah hruê 9/7, čar Lâm Đồng bi mklă lŏ mâo 1 čô djŏ klei ruă Covid 19. Anei jing F1 ti krĭng mâo 3 čô ruă wĭt mơ̆ng bubôn prŏng Hồ Chí Minh. Ênoh mnuih ruă Covid 19 mrâo hmao ƀuh ti čar Lâm Đồng jing N.H.D.K, dôk ti alŭ Phú Thạnh, să Hiệp Thạnh, kdriêk Đức Trọng (mă bruă ti Knơ̆ng prăk Agribank Lâm Đồng). Hlăm dŭm hruê êgao, K bi tuôm leh hŏng 3 čô ruă mâo bi mklă djŏ klei ruă Covid 19 hlăm hruê 7/7.

Čiăng rơ̆ng kơ hdră gang mkhư̆ klei ruă tưp, aguah hruê 9/7, Knơ̆ng bruă mdrao mgŭn čar Lâm Đồng mtrŭn leh hră hưn mthâo mjêč tui duah mnuih tuôm nao ti 8 anôk hlăm alŭ wăl ƀuôn prŏng Đà Lạt lehanăn 2 kdriêk Đơn Dương, Đức Trọng. Mbĭt anăn, pŏk ngă mjêč hdră tui duah mnuih tuôm bi mtuôm hŏng pô ruă, čuăl krĭng, ba bi ktlah lehanăn ksiêm dlăng klei ruă tưp. Truh kơ ară anei, êpul djŏ tuôm čar lâm Đồng dưi bi mklă leh 83 čô jing F1 lehanăn 571 čô jing F2 djŏ tuôm ti krĭng mâo 3 čô ruă wĭt mơ̆ng ƀuôn prŏng Hồ Chí Minh./.

Pô mblang: H’Nêč Êñuôl