VOV4.Êđê- Mmăt hruê 21/6, Anôk bruă ksiêm dlăng klei ruă tưp CDC Gia Lai hưn mthâo, alŭ wăl mrâo mâo 1 čô djŏ klei ruă Covid 19 mrâo wĭt mơ̆ng sa wăl tuh tia mkra mjing ti Bình Dương. Klă klơ̆ng, êkei ruă Covid 19 anei kkiêng thŭn 2005 jing mnuih mă bruă ti Anôk bruă đŭng hruh ƀung hdang krông ti ƀuôn prŏng Thủ Dầu 1 (čar Bình Dương). Pô anei dôk ti sang jưh kơ phung mă bruă ti ƀuôn hgŭm Nghĩa Hội (wăl krah Tân Uyên, čar Bình Dương) lehanăn wĭt kơ alŭ Yon Tok, să Ia Glai, Čư̆ Sê hlăm aguah hruê 19/6. Tlam hruê anăn, pô anei nao kơ Anôk bruă mdrao mgŭn să hưn mthâo klei suaih pral lehanăn dưi mă mta ksiêm dlăng Covid 19 kyua mrâo wĭt mơ̆ng krĭng mâo klei ruă. Ară anei, 24 čô jing F1 mơ̆ng pô ruă anei dưi bi ktlah djŏ si klei kčah mtrŭn. Ară anei, pô ruă anei ka mâo klei bi êdah êngoh hlơr lehanăn dưi ba bi ktlah mklin sa anôk. Anôk bruă sang čư̆ êa čar Gia Lai mâo leh hră m’ar mtă kơ alŭ wăl hlăm čar lŏ dơ̆ng ksiêm dlăng kjăp klei êrô êbat hŏng mnuih mơ̆ng krĭng dôk mâo klei ruă wĭt kơ alŭ wăl, mđĭ hdră ksiêm dlăng, suang dlăng ti dŭm ktuê êlan./.

Pô mblang: H’Nêč Êñuôl