VOV4.Êđê- Kdriêk Đăk Đoa, čar Gia Lai mâo ênhă êbeh 990 km² hŏng 111 alŭ, ƀuôn hlăm 17 să, wăl krah. Mâo ênhă prŏng, mnuih ƀuôn sang dôk rưng, ƀiădah kyua thâo dưn yua dŭm kdrăp yua hlăm êlan internet msĕ si: Facebok, Zalo, bruă hâo hưn hlăm alŭ wăl mâo na nao klei jăk lehanăn boh tŭ dưn.

 Djă ti kngan đĭng blŭ thâo mĭn, ayŏng Phạm Công Tùng, mnuih ƀuôn sang alŭ Tân Lập, să Trang, kdriêk Đăk Đoa, čar Gia Lai pŏk hlăm êpul zalo alŭ čiăng hmư̆ klei hâo hưn kơ klei ruă Covid-19.  Ayŏmg Tùng brei thâo, grăp hruê, anôk bruă gĭt gai gang mkhư̆ klei ruă tưp ti să mơĭt 2 klei hâo hưn jing boh klei ruă tưp ti Gia Lai leh anăn klei hâo hưn dŭm čar, ƀuôn prŏng mâo klei ruă tưp. Lui klei hâo hưn dưi bi êdah hŏng rup, anăn grăp čô mnuih ênưih thâo anak čô pô nao sang hră, nao mă bruă mơ̆ng ti anôk snăn brei bi ktlah hjăn, amâodah knŏng hưn klei suaih pral leh anăn ktuê dlăng klei suaih pral ti sang. Ăt hưn hlăm êpul zalo anei, mnuih ƀuôn sang hlăm alŭ ăt đru kơ anôk bruă ktuê dlăng mnuih ƀuôn sang hluê ngă jăk mơ̆ klei kčah mtrŭn gang mkhư̆ klei ruă tưp amâodah hơaĭ:

“Hŏng bruă ktuê dlăng mnuih ƀuôn sang wĭt mơ̆ng krĭng mâo klei ruă tưp amâodah jih wưng bi ktlah hjăn wĭt ti sang bi ktlah, phung anak čô nao hriăm hră, nao mă bruă wĭt snăn hmei ktuê dlăng. Phung hđeh wĭt hriăm hră snăn mnuih ƀuôn sang čih hưn hlăm đĭng blŭ, hlăm hla hâo hưn mbĭt, hưn mdah hŏng anôk bruă mdrao mgŭn, Knơ̆ng bruă sang čư̆ êa să čiăng brei diñu hưn klei suaih pral čiăng mnuih ƀuôn sang amâo huĭ hyưt.”

Kahan ksiêm kdriêk Đăk Đoa ktrâo lač kơ mnuih ƀuôn sang mŭt hlăm dŭm êpul zalo čiăng hmư̆ klei hâo hưn kơ klei ruă Covid-19

En-  Khua knơ̆ng bruă sang čư̆ êa, Khua anôk bruă gĭt gai gang mkhư̆ klei ruă Covid-19 să Trang. Kdriêk Đăk Đoa brei thâo, ară anei, 5 alŭ hlăm să mâo sơaĭ êpul zalo. Grăp êpul mâo mơ̆ng 120 truh 150 čô jing pô bi ala mơ̆ng dŭm gŏ sang. Anôk bruă gĭt gai, gang mkhư̆ klei ruă tưp ti să mbha mnuih hlăm êpul ênưih wĭt lač mtam klei mnuih ƀuôn sang êmuh. Tăp năng, anăn jing klei êmuh kơ hră mơar hưn klei suaih pral, đa đa dŭm bruă ngă wĭt bi ktlah ti sang, mâo đa êmuh kơ phung ƀuôn sang ti čar, ƀuôn prŏng mkăn wĭt ti alŭ wăl hưn klei suaih pral leh mơ̆ ka?

“Kyua dŭm êpul zalo anei snăn hlăm wưng êgao, ti să tŭ mă leh 143 čô mnuih ƀuôn sang wĭt mơ̆ng alŭ wăl mkăn. Hlăm anăn, đa đa hluê ngă bi ktlah hjăn, đa đa bi ktlah ti sang. Mnuih ƀuôn sang mkŏ hlăm zalo snăn dlăng anăn dŭm alŭ wăl mâo klei ruă tưp, thâo, srăng thâo răng hĭn. Tơdah ƀuôn prŏng Hồ Chí Minh hluê ngă asăp mtrŭn mrô 16 arăng pral nao ti anôk mdrao mgŭn.”

          Thiếu tá Khuất Đức Hiệu-  Khua kahan ksiêm să Trang brei thâo, ăt kyua klei tŭ dưn bi blŭ hrăm mơ̆ng dŭm êpul Zalo, mơ̆ng mlan 3 truh man 6/2021, anôk bruă bi leh hnơ̆ng kčah mkăp lu hĭn 3.600 hră kak asei mnuih ƀuôn sang ƀiădah ăt rơ̆ng kjăp hdră gang mkhư̆ klei ruă tưp. Kahan ksiêm să Trang hâo hưn kơ klei ruă tưp, anôk ngă hră mơar hră kak asei mnuih ƀuôn sang. Mnuih ƀuôn sang knŏng nao ti anôk mkăp hră kak asei 2 blư̆ jing hlăk anăn mă mrô leh anăn mmông mă hră mơar. Kyua anăn, mnuih ƀuôn sang amâo dôk guôn sui ôh, hră mơar ăt leh, leh anăn rơ̆ng bi kbưi yang ƀuôn, amâo bi kƀĭn ôh êbeh 20 čô mnuih ti anôk ngă hră kak asei mnuih ƀuôn sang:

“Leh mă hră, pô iêu arăng hgŭm hlăm hla pŏk zalo pô mtam, jak mnuih ƀuôn sang wĭt ti sang, truh ti sang bi iêu jak, bi hâo hưn. Hlăm brô 30 mnit pô čih hưn hlăm đĭng blŭ sa blư̆ snăn jing, ơ mnuih ƀuôn sang, ară anei truh mrô 59 snăn mnuih ƀuôn sang mrô 69 mprăp nao. Bi blŭ hrăm hlăm zalo anei, mjing klei găl jăk kơ mnuih ƀuôn sang leh anăn amâo bi kƀĭn lu mnuih ôh.”

Kyua ba yua tŭ dưn hla pŏk web zalo, facebook, anăn kahan ksiêm kdriêk Đăk Đoa bi leh hnơ̆ng kčah kơ bruă mkăp hră kak asei kơ mnuih ƀuôn sang, ƀiădah ăt rơ̆ng gang mkhư̆ klei ruă tưp.

Hluê si kdriêk Đăk Đoa ksiêm yap, ară anei alŭ wăl mâo êbeh 40 êbâo mrô đĭng blŭ ba yua 3G,4G. Bi mklă anei jing sa hdră hâo hưn pral, tŭ dưn leh anăn ênoh bi liê ƀiă, mơ̆ng mlan 3/2020, Knơ̆ng bruă sang čư̆ êa kdriêk Đăk Đoa jao kơ Kahan ksiêm čih mkra mbĭt hŏng fanpage hlăm facebook leh anăn hlăm Zalo official Account kơ Knơ̆ng bruă sang čư̆ êa leh anăn kahan ksiêm mơ̆ng 17 să, wăl krah hlăm kluôm kdriêk. Tinei, mnuih ƀuôn sang dưi hmư̆ klei hâo hưn bruă duh mkra-ala ƀuôn ti alŭ wăl, ktuê dlăng hdră msir mgaih hră mơar leh anăn hâo hưn kơ klei ruă tưp. Ti gưl să, anôk bruă ăt đru kơ dŭm alŭ mkŏ mjing dŭm êpul zalo čiăng bi blŭ hrăm hŏng mnuih ƀuôn sang kơ hdră gang mkhư̆ klei ruă Covid-19.

 Klei mdê êdi jing dŭm hdră hâo hưn mơ̆ng gưl kdriêk, truh să, alŭ, ƀuôn dưi bi mkŏ mbĭt. Kyua anăn, knŏng mŭt hlăm êpul anei, mnuih ƀuôn sang dưi blŭ hrăm mtam hŏng Khua anôk bruă gĭt gai gang mkhư̆ klei ruă tưp amâodah khua kahan ksiêm gưl să, kdriêk tơdah čiăng êdi. Đại uý Đàm Mai Minh Tuấn, K’iăng Khua Êpul mkŏ mjing hdră răng mgang klei êđăp ênang čar war, kahan ksiêm kdriêk Đăk Đoa brei thâo, bruă ngă hlăm dŭm êpul onlline đru bi hrŏ prăk bi liê jih hnơ̆ng, mbĭt anăn klei tŭ dưn hâo hưn ăt dưi bi mđĭ jih hnơ̆ng:

“Leh pŏk ngă êpul zalo leh anăn fanpage, bruă mprăp hră mơar bhiâo hĭn. Ênoh phung êdam êra yua hla pŏk web ala ƀuôn lu hĭn phung khua thŭn, snăn ênoh phung ba yua jăk hĭn. Sĭt knuă druh nao kơ ƀuôn sang, čih mkra klei čih, rup, video, masin, kdrăp mnơ̆ng gun dleh dlan snăk. Ƀiădah hlăm hla pŏk web ala ƀuôn, pral, knŏng ba klei hâo hưn 3 -4 mnĭt snăn jih jang mnuih thâo leh sơaĭ.”

Bruă ba yua masin, đĭng blŭ thâo mĭn ară anei mâo lu ti čar Gia Lai, yap wăt krĭng taih kbưi, bruă mnuih ƀuôn sang ba yua dŭm hla pŏk web ala ƀuôn ciăng bi blŭ hrăm ăt mâo lu mơh Ba yua hla pŏk web ala ƀuôn hlăm bruă kriê dlăng, gĭt gai, dŭm anôk bruă, adŭ bruă, dŭm alŭ-să ti Đăk Đoa leh anăn kluôm čar Gia Lai dưi msir mgaih leh klei dleh dlan kyua bi kbưi, đru ba mnuih ƀuôn sang giăm hĭn hŏng bruă sang čư̆ êa dŭm gưl. Hlăm boh klei bi ktlah yang ƀuôn gang mkhư̆ klei ruă Covid-19, dŭm kdrăp anei ƀrư̆ brei buh klei tŭ dưn klă sĭt, đru mkhư̆ klei ruă tưp, rơ̆ng mđĭ lar bruă duh mkra mnia blei./.

Pô mblang: H’Zawut Ƀuôn Yă