VOV4.Êđê- Aguah 19/11, klei hâo hưn mơ̆ng Anôk bruă gĭt gai gang mkhư̆ klei ruă tưp kdriêk Đăk Đoa, čar Gia Lai, mơ̆ng bruă test pral, alŭ wăl mrâo ƀuh 125 čô djŏ kman Sars-Cov-2. Hlăm anăn, 58 čô mâo klei tŭ ksiêm mkă Real time PCR djŏ klei ruă. Ară anei mâo 5/8 alŭ, ƀuôn ti să Hà Bàu mâo mnuih ruă Covid-19. Tinei, lu anôk mâo klei ruă dleh ktuê dlăng kwang dar êjai čiăng hiu duah ksiêm mkă msĕ si Sang hră gưl 1 Hà Bàu. Sang dhar kreh êpul êya să Hà Bầu, dŭm sang čhĭ kphê, anôk khăt ƀuk ti anôk êlan bi ktlah mpă bi knông plah wah Hà Bầu hŏng să Nam Yang, kdriêk Đăk Đoa.

Anôk bruă gangmkhư̆ klei ruă Covid-19 čar Gia lai tiŏ nao leh êpul mă bruă ti kdriêk Đăk Đoa čiăng bi hgŭm pŏk ngă dŭm hdră msir gang mkhư̆ klei ruă tưp. Kdriêk Đăk Đoa mtă kơ mnuih ƀuôn sang ngă bi jăk 5 klei mtă gang mkhư̆ klei ruă tưp, amâo dôk bi nghi ôh, hmao hưn kơ bruă sang čư̆ êa sĭt mâo klei djŏ tuôm kơ phung ruă, dŭm anôk mâo mnuih ruă, amâodah sĭt mâo klei bi knălêngoh, mtŭk, dleh bi êwa.

Pô mblang: H’Zawut Ƀuôn Yă