VOV4.Êđê- Wăt tơdah boh klei ruă Covid-19 dleh ktuê dlăng, ƀiădah 6 mlan êgao, čar Gia Lai ăt mâo hnơ̆ng đĭ kyar 9,7%. Klei tŭ anei dưi đru mguôp mơ̆ng alŭ wăl mjing klei găl đĭ kyar 2 bruă duh mkra phŭn jing pui kmlă lŏ mkra mjing leh anăn rông mnơ̆ng ba yua kdrăp mrâo. Anăn jing klei bi mklă hlăm Klei bi kƀĭn Anôk bruă gĭt gai bruă Đảng čar tal 4 pŏk mlar mâo Bruă Đảng čar Gia Lai mkŏ mjing hruê 2-7. Hluê si klei hâo hưn, 6 mlan êgao, ênoh mkra mjing mơ̆ng čar mâo êbeh 11 êbâo êklai prăk, đĭ êbeh 17% mkă hŏng wưng anei thŭn dih; ênoh prăk duh bi liê kluôm ala ƀuôn ti Gia Lai mâo giăm 33.500 êklai prăk. Mkrah wah hlăm ênoh anei dưi mâo kyua pŏk ngă dŭm hdră bruă pui kmlă êran hŏng angĭn, hŏng êbeh 17 êbâo êklai prăk. Mbĭt hŏng anăn, ară anei Gia Lai mâo 33 hdră bruă rông mnơ̆ng ba yua kdrăp mrâo dưi duh bi liê, hŏng ênoh prăk êbeh 4.500 êklai prăk. Ăt hlăm wưng êgao, čar pla mrâo 131 ha dliê, bi mlih êbeh 700 ha ana pla mjing amâo tŭ dưn.

Pô mblang: H’Zawut Ƀuôn Yă