VOV4.Êđê - Wưng thŭn 2021-2025, dŭm alŭ wăl hlăm čar Gia Lai pral mkŏ mjing hdră mkra mđĭ mnuôr mđoh êa kñăm mkăp êa krih, mđĭ klei tŭ dưn mkra mjing lŏ hma. Hjăn kdriêk Čư̆ Sê, mơ̆ng thŭn 2018 truh ară anei duh bi liê leh giăm 10 êklai prăk čiăng mkra mđĭ dŭm êlan mnuôr mđoh êa dlông 18 km. Ti alŭ wăl kdriêk mâo 46 hdră bruă knơ̆ng kdơ̆ng êa hŏng klei krih kơ êbeh 1.400 ha mdiê leh anăn 1900 ha ana sui thŭn, djam tam. Hdră mkra mnuôr mđoh êa dưi mkra mđĭ jing 52,2 km msir mgaih êa krih leh anăn klei čiăng pŏk mlar ênhă pla mjing, mđĭ prăk hrui wĭt kơ mnuih ƀuôn sang. Hồ Phước Thành - Khua Knơ̆ng bruă Hdră kčah leh anăn Duh bi liê čar Gia Lai brei thâo: Mơ̆ng tur knơ̆ng klei čiăng leh anăn klei dưi mdrơ̆ng mơ̆ng dŭm alŭ wăl, knơ̆ng prăk čar srăng đru kah knar Khua Knŭk knar grăp thŭn 100 êklai prăk leh anăn srăng mđing bi liê lu hĭn anei čiăng mđĭ pral hnơ̆ng hluê ngă hdră mkra mđĭ mnuôr mđoh êa, prăk bi liê wưng 2021-2025 hlăm brô 5 êtuh êklai prăk.

 H’ Zawut pô mblang