VOV4.Êđê- Leh êbeh 3 thŭn hluê ngă Asăp mtrŭn mơ̆ng Anôk bruă Đảng čar Gia Lai kơ bruă mkŏ mkra krĭng ƀuôn sang mrâo ti krĭng mnuih djuê ƀiă, lu krĭng ƀuôn sang mâo leh klei bi mlih. Hlăm 3 thŭn êgao, kluôm čar duh bi liê leh giăm 1 êbâo êklai prăk kơ bruă mkŏ mkra krĭng ƀuôn sang mrâo ti krĭng mnuih djuê ƀiă. Mơ̆ng anăn, lu ƀuôn sang mnuih djuê ƀiă mâo leh klei bi mlih jăk siam.

Mâo leh 2 thŭn hŏng anei, ƀiădah mnuih ƀuôn sang ti ƀuôn Sơn, să Ia Nan, kdriêk Đức Cơ, čar Gia Lai amâo wơr ôh hruê dưi tŭ yap jing krĭng ƀuôn sang mrâo. Anăn jing gru bi êdah klei gĭr mơ̆ng gưl bruă Đảng nah gŭ, bruă sang čư̆ êa lehanăn mnuih ƀuôn sang krĭng knông lăn bŏ hŏng klei dleh dlan hŏng hnơ̆ng kčưm jing 5/19 hnơ̆ng čuăn mkŏ mkra krĭng ƀuôn sang mrâo.

Khua mduôn Siu Bình lač: “Mkŏ mkra krĭng ƀuôn sang mrâo čiăng kơ anak čô dưi mâo sang hră mơar siam, mâo tač čưng boh, dŭm êlan klông hŏng pêtông doh siam… mjing klei siam kơ ƀuôn pô jing bi msiam anôk knông lăn doh siam lehanăn mdrŏng sah.”

Dŭm klei mĭn anăn khădah điêt ƀiădah jing klei gĭr jih ai tiê mơ̆ng mnuih ƀuôn sang krĭng knông lăn. Ăt kyuanăn, mnuih ƀuôn sang ti ƀuôn Sơn čŏng myơr truh kơ dŭm êtuh m² lăn, đru mguôp 200 êklăk prăk lehanăn dŭm êtuh hruê ai mă bruă čiăng hrăm mbĭt mkŏ mkra krĭng ƀuôn sang mrâo. Truh kơ knhal tuič thŭn 2018, ƀuôn Sơn dưi tŭ yap jing krĭng ƀuôn sang mrâo ti anôk knông lăn hlăm čar.

            Mơ̆ng ƀuôn Sơn, ară anei, să Iă Nan lŏ mâo thiăm 3 ƀuôn mâo ênŭm hnơ̆ng čuăn jing krĭng ƀuôn sang mrâo. Lehanăn msĕ hŏng rup thâo bi lar, truh kơ ară anei, hlăm alŭ wăl să knông lăn mâo: Ia O, Ia Čĭa (kdriêk Ia Grai), Ia Dom, Ia Nan (Kdriêk Đức Cơ) dưi mâo truh 17 ƀuôn mnuih djuê ƀiă dưi mâo ênŭm hnơ̆ng čuăn mkŏ mkra krĭng ƀuôn sang mrâo.

            Să Ia Čĭa mâo knŏng 10 boh ƀuôn ƀiădah mâo leh 5 ƀuôn jing krĭng ƀuôn sang mrâo. Châm Hí, khua mduôn ƀuôn Kom Ngo brei thâo: “Hlăm ƀuôn mâo 221 gŏ sang hlăm ƀrô 1.000 čô mnuih, hnơ̆ng gŏ sang dôk ƀun ƀin mâo 4,1%. Tơdah hlăk thŭn 2016, ênoh prăk ba wĭt kah knar kơ sa čô mnuih mâo hlăm ƀrô 16 êklăk prăk, ƀiădah ară anei dưi đĭ truh kơ 41 êklăk prăk. tui hluê hdră êlan mkŏ mkra krĭng ƀuôn sang mrâo, dŭm mnơ̆ng dhơ̆ng duh bi liê dưi bi kluôm ênŭm, mnuih ƀuôn sang amâo lŏ guôn knang kơ klei đru mơ̆ng knŭk kna ôh.”

Ăt msĕ hŏng anăn, ti ƀuôn Mook Trêl (să Ia Dom, kdriêk Đức Cơ) mâo lu klei mlih. Khua ƀuôn Ksor Ƀia lač: “Mnuih mâo na nao klei gĭr găn klei dleh dlan čiăng mkŏ mkra krĭng ƀuôn sang mrâo. Êngao kơ klei đru mơ̆ng knŭk kna, mnuih ƀuôn sang ăt čŏng đru mguôp prăk lehanăn hruê ai mă bruă čiăng mkra êlan klông hlăm ƀuôn, êlan nao kơ lŏ hma. Mbĭt hŏng anăn, duh bi liê lehanăn mkŏ mkra sang hră kơ hđeh điêt. Ênoh prăk ba wĭt kah knar hlăm sa čô truh kơ 41,1 êklăk prăk/ thŭn.”

Krĭng ƀuôn sang mrâo ti să Ia Dom, kdriêk Đức Cơ - Gia Lai

            Tui hluê klei čih yap, čiăng mkŏ mkra krĭng ƀuôn sang mrâo hlăm anôk mnuih djuê ƀiă ti dŭm alŭ wăl să knông lăn, mnuih ƀuôn sang bi mguôp leh truh kơ 3 êklai prăk lehanăn dŭm êbâo hruê ai mă bruă.

Nguyễn Ngọc Phận, k’iăng khua bruă sang čư̆ êa kdriêk Đức Cơ brei thâo: Hdră êlan mkŏ mkra krĭng ƀuôn sang mrâo mâo anôk kčưm ƀiădah amâo mâo anôk bi ruê̆. Kyuadah bruă kñăm yuôm bhăn mơ̆ng hdră êlan anei jing mđĭ klei hdĭp mnuih ƀuôn sang, mgaih msir bruă mă lehanăn mâo klei mkŏ mkra kluôm ênŭm ti knông lăn. Čiăng rơ̆ng lehanăn mđĭ hnơ̆ng krĭng ƀuôn sang mrâo, čiăng mâo nanao klei gĭr mơ̆ng gưl bruă Đảng nah gŭ, bruă sang čư̆ êa alŭ wăl lehanăn jih jang mnuih ƀuôn sang.

Mđup brei hră tŭ yap - “Ƀuôn sang djăp hnơ̆ng čuăn krĭng ƀuôn sang mrâo” ti Gia Lai

 Tui hluê hdră mtrŭn mrô 12-CT/TU mơ̆ng bruă Đảng čar Gia Lai “Kơ bruă mđĭ klei gĭt gai mơ̆ng gưl bruă Đảng nah gŭ kơ bruă mkŏ mkra krĭng ƀuôn sang mrâo ti anôk mnuih djuê ƀiă”. Tui hluê klei anăn, knơ̆ng bruă lŏ hma lehanăn krĭng ƀuôn sang čar Gia Lai mkŏ mkra leh “Hnơ̆ng čuăn mkŏ mkra krĭng ƀuôn sang mrâo”. mbĭt hŏng anăn lŏ mtô kơ dŭm alŭ wăl dưi tui ngă. Hnơ̆ng čuăn anăn mâo 5 êpul: čuăl mkă, bruă duh mkra - ala ƀuôn, bruă duh mkra lehanăn êpul mkra mjing, dhar kreh - yang ƀuôn - wăl hdĭp mda, bruă kđi čar - lĭng kahan - klei êđăp ênang. Tui hluê hră klei mtô ktrâo atăt, bruă sang čư̆ êa dŭm kdriêk, wăk krah, ƀuôn prŏng srăng mkŏ mjing dŭm hnơ̆ng čuăn djŏ hŏng klei jing, klei găl hlăm grăp alŭ wăl lehanăn ngă dŭm hnơ̆ng čuăn anăn. Truh kơ ară anei, dŭm kdriêk, wăl krah, ƀuôn prŏng ti čar Gia Lai ba mdah leh hnơ̆ng čuăn klei bi hmô hlăm alŭ wăl mâo 5 êpul hnơ̆ng čuăn, hnơ̆ng čuăn klă mngač, srăng mâo mơ̆ng 15 - 19 hnơ̆ng čuăn djŏ hŏng grăp alŭ wăl mdê mdê.

Leh 3 thŭn tui ngă hdră mtrŭn 12-CT/TU hruê 13/2/2018 mơ̆ng êpul hlăm bruă Đảng čar Gia Lai kơ bruă mđĭ klei gĭt gai mơ̆ng gưl bruă Đảng nah gŭ kơ bruă mkŏ mkra krĭng ƀuôn sang mrâo hlăm anôk mnuih djuê ƀiă. Truh kơ ară anei, kluôm čar mâo 83 alŭ, ƀuôn dưi tŭ yap jing krĭng ƀuôn sang mrâo. Hlăm 3 thŭn leh êgao, kluôm čar duh bi liê êbeh 975 êklai prăk čiăng mkŏ mkra krĭng ƀuôn sang mrâo jing anôk mnuih djuê ƀiă. Hlăm anăn, ngăn prăk mơ̆ng gưl dlông lehanăn ngăn prăk mơ̆ng čar jing 766,3 êklai prăk, ngăn prăk gưl kdriêk êbeh 44,9 êklai prăk, ngăn prăk gưl să êbeh 12,6 êklai prăk, ngăn prăk mơ̆ng knơ̆ng bruă hlăm ƀrô 21,2 êklai prăk, mnuih ƀuôn sang bi mguôp truh kơ êbeh 93,6 êklai prăk, ngăn prăk mơ̆ng anôk mkăn êbeh 37 êklai prăk. Êngao kơ năn, dŭm alŭ wăl dưi iêu jak truh kơ 36.551 hruê ai mă bruă lehanăn myơr 86.813 m² lăn čiăng ngă êlan hlăm krĭng ƀuôn sang, mdơ̆ng sang roong, sang dôk lehanăn dŭm klei mkŏ mkra mkăn.

Pô mblang: Y-Khem Niê