VOV4.Êđê- Leh giăm 1 mlan pŏk ngă, Knơ̆ng bruă mặt trận čar Gia Lai tŭ mă leh êbeh 10 êklai prăk đru mơ̆ng dŭm êpul bruă kñăm hrăm mbĭt mguôp hlăm keh gang mkhư̆ klei ruă Covid-19. Hluê si Knơ̆ng bruă mặt trận čar Gia Lai, leh giăm 1 mlan pŏk ngă, mâo leh êbeh 200 anôk bruă, epeul bruă hŏng lu mnuih ƀuôn sang đru êbeh 10 êklai prăk čiăng gang mkhư̆ klei ruă Covid-19.

Êngao kơ prăk đru čiăng hrăm mbĭt hŏng čar Gia Lai blei kdrăp mnơ̆ng mdrao mgŭn đri kơ hdră gang mkhư̆ klei ruă tưp, phung mâo ai tiê kmah lŏ đru mguôp lu mnơ̆ng dhơ̆ng msĕ si mnơ̆ng ƀơ̆ng huă, êa mnăm, čhiăm guôm ƀô̆… kơ wăl bi ktlah hjăn, kơ êpul dôk ngă bruă ti anôk phŭn mdrơ̆ng hŏng klei ruă tưp.

Pô mblang: H’Zawut Ƀuôn Yă