VOV4.Êđê- Kñăm hyuă kjăp bruă hluê ngă Asăp mtrŭn mrô 16/CT-TTg hluê si klei gĭt gai mơ̆ng Anôk bruă gang mkhư̆ klei ruă Covid 19 čar Gia Lai, Anôk bruă sang čư̆ êa ƀuôn prŏng Pleiku, čar Gia Lai mâo leh hră ktrâo lač bruă găn êrô, kñăm bi hrŏ tuič hnơ̆ng ênoh mnuih kbiă ti êlan. Anôk bruă sang čư̆ êa ƀuôn prŏng Pleiku mtă kơ mnuih kbiă ti êlan čiăng nao mă bruă brei ba hră kak asei, hră bi mklă jing mnuih mă bruă, hră bi mklă mơ̆ng anôk bruă (amâo dah mâo hră dưi găn êrô mâo anôk bruă mkăp) kñăm rơ̆ng klei dưi êrô êbat găn dŭm anôk ksiêm dlăng mơ̆ng să, ƀuôn hgŭm amâo dah dŭm êpul ksiêm dlăng mbĕ hiu mơ̆ng êpul kahan ksiêm ƀuôn prŏng. Ƀuôn prŏng Pleiku hluê ngă Asăp mtrŭn mrô 16/CT-TTg mơ̆ng hruê 28/8 truh kơ ară anei, ƀuh mnuih ƀuôn sang hluê ngă kjăp klei kčah mtrŭn. Khă snăn, ăt mâo dŭm anôk dôk bi nghi lu mnuih, truă čhiăm guôm ƀô̆ amâo djŏ hdră, lu mnuih ƀuôn sang kbiă ti êlan amâo mâo bruă mjêč. Mơ̆ng hruê 28/8 truh kơ hruê 5/9, ƀuôn prŏng Pleiku bi kmhal leh 93 čô ngă soh hŏng klei kčah mtrŭn gang mkhư̆ klei ruă tưp hŏng ênoh prăk đŭ bi kmhal truh 303 êklăk prăk./.

Pô mblang: H’Nêč Êñuôl