VOV4.Êđê - Ară anei, čar Gia Lai hlăk mâo 16/17 anôk ngă bruă pui kmlă bi êran hŏng ai angĭn hlăk dôk mkra, hŏng hnơ̆ng êbeh 1200 MW mâo ênoh prăk duh bi liê êbeh 40 êbâo êklai prăk. Khă snăn, Bruă mâo lu phung duh bi liê “Bi mtiŏ êran” ngă mkra čiăng dưi mkăp pui kmlă êlâo kơ hruê 31/10/2021 čiăng dưi dưn klei jăk găl hluê si hdră mtrŭn mơ̆ng knŭk kna ngă bluh mâo lu klei dleh kpăk hlăm bruă hluê ngă lehanăn ba yua mnuih mă bruă. Anôk bruă sang čư̆ êa čar Gia Lai brei thâo, čar dôk mđing msir mghaih lehanăn srăng pral dưi mghaih msir jih klei gun kpăk anei.

Tui si klei tŭ dưn mơ̆ng bruă ksiêm dlăng hlăk knhal jih mlan 4/2021 mơ̆ng knơ̆ng bruă tuh tia čar Gia Lai, ară anei mâo 16/17 hdră mkra mjing pui kmlă bi êran hŏng ai angĭn dôk dưi mkŏ mkra, ƀiădah mâo lu pô duh bi liê ka bi leh ôh hră mơar mưn lăn yua tui si hdră bhiăn kơ klei lăn yua. Mdê hŏng anăn, mâo đa đa hdră anei ti kdriêk Krông Chro mkŏ mjing ti anôk jing lăn dliê. Nguyễn Duy Lộc, k’iăng khua kiă kriê knơ̆ng bruă tuh tia čar Gia Lai brei thâo, boh phŭn, anei jing dŭm klei mkŏ mkra gưl 1, dôk hlăm klei ksiêm dlăng mơ̆ng phŭn bruă tuh tia.  Êjai ngă bruă, dŭm anôk bruă knŏng hưn mă hŏng bruă sang čư̆ êa gưl kdriêk, kyuanăn yơh truh kơ bruă nao ksiêm dlăng hlăk knhal jih mlan 4, knơ̆ng bruă tuh tia thâo klă dŭm klei anei. Hŏng dŭm hdră mkra mjing pui kmlă bi êran hŏng ai angĭn ti anôk jing lăn dliê, knơ̆ng bruă srăng mâo klei kčĕ ba ênhă lăn anei kbiă đuê̆ mơ̆ng klei jing lăn dliê. Nguyễn Duy Lộc, k’iăng khua kiă kriê knơ̆ng bruă tuh tia čar Gia Lai brei thâo, anôk bruă dôk hrăm mbĭt hŏng dŭm dhar bruă lehanăn pô duh bi liê kơ bruă anei ngă klei bi mlih, bi leh hră mơar djŏ hŏng klei bhiăn:“Dŭm anôk bruă bi êdah jing êjai ngă bruă, hră mơar akâo mưn lăn dôk dưi bi mklă, dŭm anôk bruă djŏ tuôm dôk ksiêm duah. Knơ̆ng bruă tuh tia dôk kčĕ klei anei hŏng čar Gia Lai. Ai tiê jing mpŭ kơ klei bhiăn ala čar, hmei ngă leh klei găl kơ dŭm čô duh bi liê hmao ruh mgaih dŭm klei dleh dlan truh kơ klei mkra mjing. Amâo mâo ôh bruă ngă pŏk êlan bi gao hĕ klei bhiăn ala čar.”

Boh klei dôk đĭ hlăm dŭm hdră mkra mjing pui kmlă bi êran hŏng ai angĭn ară anei jing bruă mưn yua giăm 300 mnuih mă bruă mơ̆ng ala tač êngao (lu hlăm anăn jing mnuih Trung Quốc) ka mâo ôh hră mơar tŭ ư. Nguyễn Văn Lộc, k’iăng khua adŭ bruă ti bruă sang čư̆ êa čar Gia Lai brei thâo, mâo leh hră mtrŭn mơ̆ng bruă sang čư̆ êa čar Gia Lai mñă kơ dŭm anôk bruă mgaih msir kjăp bruă anei. Tui si ai tiê, tơdah knơ̆ng bruă amâo mâo ênŭm ôh hră mơar kơ dŭm čô mă bruă mơ̆ng ala čar tač êngao tui si klei bhiăn, alŭ wăl srăng ngă bruă suôt đuê̆ pô mă bruă mơ̆ng ala tač êngao anăn wĭt kơ ala čar phŭn. “Čar Gia Lai gĭt gai lehanăn ba jao leh kơ dŭm anôk bruă djŏ tuôm nao ksiêm dlăng hră mơar, hlei pô anăn lehanăn ya hruê hriê, jing pô thơ̆ng kơ bruă amâo dah mnuih mă bruă hơăi mang čiăng mâo dŭm klei bi klă ƀuah mkra dŭm čô mă bruă lehanăn knơ̆ng bruă yua mnuih mă bruă anăn. Tơdah amâo mâo ênŭm klei găl srăng suôt wĭt kơ ala čar phŭn. Bruă klam ti nei kơ bruă kiă kriê, ksiêm dlăng hră mơar mă bruă jing mơ̆ng knơ̆ng bruă mnuih mă bruă, kahan êka êkeh lehanăn yang ƀuôn, suôt wĭt kơ ala čar phŭn jing êpul kahan ksiêm čar kčĕ brei. Ƀiădah kơ bruă anei dôk bi leh hră mơar, kyuanăn yơh dŭm anôk bruă dôk akâo bi tai hruê mmông mgaih msir.”