VOV4.Êđê - Hruê mbruê 24/6, hlăm bruă mă lehanăn ksiêm mkă kman hlăm dŭm anôk bi ktlah mbĭt, anôk bruă ksiêm dlăng klei ruă tưp čar Gia Lai hưn mthâo lŏ mâo 2 čô mâo klei ruă tưp Covid-19, 2 čô anei dôk ti ƀuôn Yon Tok, să ia Glai, kdriêk Čư̆ sê. Jih dua čô anei jing 2 čô mă bruă mrâo wĭt mơ̆ng čar Bình Dương mbĭt hŏng pô ruă mrô 13486. Ksiêm mkă kman gưl tal 1 ti hlăk hruê 21/6, 2 čô anei amâo ƀuh ôh kman Sars- CoV-2. Lehanăn ngă klei ksiêm mkă kman gưl tal 2 ti hruê 24/6 jing mâo kman Sars-CoV-2 hlăm 2 čô anei. Ară anei, 2 čô anei adôk suaih pral, amâo mâo klei mtuk lehanăn êngoh ôh, lehanăn dôk mâo klei lŏ ksiêm dlăng. Djŏ tuôm hŏng 2 čô mâo klei ruă tưp anei, dŭm anôk bruă djŏ tuôm čar Gia Lai ngă leh bruă ksiêm mkă kman kơ 6 čô jing F1 ti kdriêk Čư̆ Sê, Phú Thiện lehanăn Krông Pa. Ară anei dŭm mta mă ksiêm mkă kman amâo mâo ƀuh ôh kman. Mđĭ bruă gang mkhư̆ klei ruă tưp Covid-19, čar Gia Lai dôk mă lehanăn bi ktalh mbĭt 449 čô mnuih, hlăm anăn mâo 400 čô mnuih hlăm ala čar lehanăn 49 čô mnuih mơ̆ng ala tač êngao.