VOV4.Êđê- Tui si êpul gĭt gai bruă gang mkhư̆ klei ruă tưp Covid-19 čar Gia Lai, tlam mmăt mbruê 7/7, čar Gia Lai lŏ mâo 2 čô mâo klei ruă tưp Covid-19, jih 2 čô anei dôk ti ƀuôn Kte, să H’Bông, kdriêk Čư̆ Sê, čar Gia Lai. 2 čô mnuih ruă anei jing dua čô êkei, K.N (kkiêng thŭn 2003) lehanăn K.Q (kkiêng thŭn 2001). Diñu dua đĭ êdeh p’phŭt mơ̆ng sang mrô 163 êlan Huỳnh Tấn Phát, ƀuôn hgŭm Tân Thượng Đông, kdriêk čar mrô 7, ƀuôn prŏng Hồ Chí Minh wĭt kơ să H’Bông, kdriêk Čư̆ Sê hlăk hruê 4/7.

Ară anei 2 čô anei dưi ba bi ktlah lehanăn mdrao mgŭn ti anôk bi ktlah mbĭt bruă mdrao mgŭn čar Gia Lai. Êpul êya ngă bruă nao mjêč leh hlăm bruă tui duah dŭm čô F1, F2 djŏ bi tuôm. Hŏng 2 čô mnuih ruă mrâo anei, yap mơ̆ng hruê 26/4 truh kơ ară anei, čar Gia Lai mâo leh 6 čô mâo klei ruă tưp Covid-19.

Pô mblang: Y-Ƀel Êban