VOV4.Êđê -  Tlam mmăt mbruê (16/7), Gia Lai lŏ mâo sa čô djŏ klei ruă Covid-19. Hmư̆ klei hâo hưn hlăm klei ksiêm mkă kman hmar mâo sa čô mâo kman Sars CoV 2 ti sang hră gưl prŏng bruă mdrao mgŭn Hoàng Anh Gia Lai jing N.T.T.N, k’kiêng 1978, dôk ti alŭ 8, wăl krah Phú Túc, kdriêk Krông Pa, čar Gia Lai. Anôk bruă ksiêm dlăng klei ruă tưp čar Gia Lai tiŏ nao leh phung knuă druh nao bi mklă lehanăn mă mta ksiêm mkă kman. Truh kơ 4 mmông tlam mbruê, boh tŭ hlăm klei ksiêm mkă brei ƀuh pô anei sĭt jing mâo klei ruă tưp Covid-19. Pô ruă anei dưi ba bi ktlah, mdrao mgŭn ti anôk mdrao mgŭn kơ mnuih ruă Covid-19, sang êa drao prŏng čar Gia Lai. Leh hmao thâo pô ruă N.T.T.N anei, êpul gĭt gai, gang mkhư̆ klei ruă tưp mjêč ngă leh bruă tui duah phung tuôm jĕ giăm hŏng pô ruă anei, ngă dŭm hdră êlan gang mkhư̆ klei ruă tưp Covid-19 djŏ hŏng hdră bhiăn.

H Zawut pô mblang