VOV4.Êđê - Ti čar Gia Lai, lu êpul bruă, mnuih mâo leh bruă ngă klă sĭt čiăng bi đru klei dleh dlan hŏng êpul gang mkhư̆ klei ruă tưp anôk phŭn. 

Kñăm hgŭm kngan đru kơ čar Gia Lai hlăm hdră gang mkhư̆ klei ruă Covid 19; Êpul klei bi đru Fly To Sky bi hgŭm hŏng Êpul êdam êra Việt Nam čar Gia Lai mkŏ mjing leh hdră “Bi đru čung ba – Gia Lai hgŭm kngan msưh kdŭn klei ruă Covid 19” hŏng dŭm asăp hưn mthâo jăk siam kơ klei đua klam mơ̆ng mnuih ƀuôn sang lehanăn mđĭ lar ai tiê bi hgŭm mguôp hlăm êpul êya. Êpul đru kơ mnuih knap mñai anei lŏ mđup brei kơ Anôk gĭt gai hdră gang mkhư̆ klei ruă tưp čar Gia Lai dŭm mta mnơ̆ng msĕ si čhiăm guôm ƀô̆, ală kĭng gang, êa rao bi mdjiê kman, kdrăp ksiêm dlăng hnơ̆ng hlơr lehanăn dŭm mta mnơ̆ng yua mkăn. Ayŏng Lê Văn Phúc – Khua êpul klei bi đru lač snei: “Jing sa čô mnuih Việt Nam, jing sa čô anak mơ̆ng krĭng lăn Gia Lai, kâo ăt msĕ hŏng jih jang ƀĭng găp hlăm Êpul klei bi đru dôk mđing uêñ. Hlăm 4 gưl bluh mâo klei ruă Covid 19, êpul kreh mkŏ mjing lu hdră đru kơ bruă gang mkhư̆ klei ruă tưp lehanăn truh kơ ară anei, ênoh đru kluôm mâo leh 5 êklai prăk. Hŏng klei čang hmăng đru kơ dŭm êpul ngă bruă klam ăt msĕ mơh mnuih dleh dlan ti alŭ wăl čar, bi đru gui klei dleh dlan kñăm msưh kdŭn klei ruă Covid 19.

Bi ayŏng Phạm Thăng Bằng – Khua đang war mnga pôk ti ƀuôn prŏng Pleiku dôk hrăm mbĭt hŏng mnuih hgŭm hlăm Êpul “Mnga pôk Gia Lai” mđup brei leh 295 êklăk prăk lehanăn 100 huôm ƀung hdang krô truh kơ Anôk gĭt gai hdră gang mkhư̆ klei ruă Covid 19 čar Gia Lai. Ayŏng Phạm Thăng Bằng, brei thâo: “Kâo čang hmăng dŭm anôk bruă lehanăn mnuih ƀuôn sang sa ai, bi hgŭm mguôp, hluê ngă kjăp klei gĭt gai mơ̆ng gưl dlông čiăng kơ drei dưi msưh kdŭn klei ruă tưp, bi leh klei čang hmăng mơ̆ng mnuih ƀuôn sang jing pral mjưh tuič klei ruă tưp anei.

Mbĭt hŏng ai tiê “Thâo bi đru”, dŭm hruê êgao, lu êpul ngă klei bi đru mâo đru mguôp leh lu mnơ̆ng dhơ̆ng yua hlăm bruă mdrao mgŭn msĕ si čhiăm guôm ƀô̆, êa rao bi mdjiê kman, lu ton djam mtam, boh kroh djăp mta čiăng đru kơ êpul ba anăp jih hruê mlam gang mkhư̆ klei ruă tưp. Hluê si Dhar bruă mặt trận čar Gia Lai, leh êbeh 3 mlan mtrŭt mjhar, êpul êya tŭ mă leh prăk kăk mbĭt hŏng mnơ̆ng dhơ̆ng mơ̆ng 345 êpul êya, mnuih đru kơ hdră gang mkhư̆ klei ruă Covid 19 čar Gia Lai, hŏng ênoh jih jang giăm 22 êklai prăk. Aduôn Phạm Thị Lan – K’iăng khua anôk bruă mặt trận čar Gia Lai brei thâo: “Hmei mâo leh Asăp iêu mthưr klei sa ai, thâo bi đru mơ̆ng dŭm êpul êya, mnuih, dŭm anôk bruă duh mkra mđing truh asăp iêu mthưr đru kơ hdră gang mkhư̆ klei ruă Covid 19. Hmei srăng yua ênoh prăk anei čiăng đru kơ dŭm anôk bi ktlah mơ̆ng êpul kahan hlăm čar lehanăn dŭm anôk bruă mdrao mgŭn, mbĭt anăn đru kơ mnuih ƀuôn sang hlăm krĭng mâo klei ruă tưp msir mghaih klei dleh dlan, bi h’ĭt klei hdĭp. Čang hmăng, hŏng klei hgŭm kngan, bi mguôp sa ai drei srăng dưi msưh kdŭn jih klei ruă tưp anei”./.