VOV4.Êđê- Tlam mmăt 28-5, mơ̆ng bruă ksiêm mkă, Anôk bruă ktuê dlăng klei ruă (CDC) Gia Lai ƀuh 1 čô mnuih djŏ kman SARS-CoV-2 mâo phŭn mtưp mơ̆ng Hà Nội. Klă klơ̆ng, L.H.L ( kkiêng thŭn 1977, dôk ti wăl krah Kông Chro, kdriêk Kông Chro, Gia Lai). Pô anei jing F1 mơ̆ng mnuih ruă Covid-19 mrô 5410. Mơ̆ng klei ksiêm mkă, CDC Gia Lai bi mklă 18 čô jing F1 leh anăn 95 čô jing F2 mnuih ruă anei.

Ară anei, phung anei dưi bi ktlah hjăn djŏ hdră bhiăn, mbĭt anăn dŭm alŭ wăl pô anei tuôm nao kđăl ƀăng leh, mƀlir klei hưn răng leh anăn dưi krih êa drao mdjiê kman hluê si hdră kčah. Anôk bruă gĭt gai gang mkhư̆ klei ruă Covid-19 Gia Lai mtă kơ dŭm dhar bruă, alŭ wăl mđĭ hnơ̆ng hưn răng hŏng bruă gang mkhư̆ klei ruă tưp; lŏ dơ̆ng ngă jăk bruă ksiêm dlăng, ktuê dlăng phung hriê mơ̆ng dŭm krĭng huĭ mâo klei ruă tưp, phung thơ̆ng kơ bruă, mnuih ala tač êngao dôk mă bruă ti alŭ wăl, mâo hdră ksiêm mkă ktuê dlăng djŏ guôp čiăng gang mkhư̆ klei ruă tưp.

Pô mblang: H’Zawut Ƀuôn Yă