VOV4.Êđê- Dŭm êtuh čô knuă druh, kahan ksiêm leh anăn êpul lĭng kahan hlăm Anôk bruă gĭt ga gang mkhư̆ klei ruă tưp Covid-19 Gia Lai mjêč mbha êpul, bi ktlah hjăn dŭm êbâo čô mnuih ƀuôn sang wĭt mơ̆ng klei mâo klei ruă tưp ƀuôn prŏng Hồ Chí Minh, leh ƀuôn prŏng anei ngă klei bi ktlah kluôm yang ƀuôn. Bruă mbha êpul mkŏ mjing mơ̆ng 2 mmông aguah 31-5. Hluê anăn, êpul mă bruă mơ̆ng Anôk bruă gĭt gai gang mkhư̆ klei ruă COVID-19 Gia Lai brei êbeh 1500 čô mnuih hlăm 53 boh êdeh leh anăn 116 čô mnuih hlăm sa gưl phiơr mơ̆ng ƀuôn prŏng Hồ Chí Minh wĭt ti ƀuôn prŏng Pleiku hưn klei suaih pral. Leh ksiêm mkă, 667 čô mnuih dưi mă mta ksiêm mkă Covid-19, 133 čô ba bi ktlah hjăn ti kdriêk Đức Cơ. Phung tuê adôk bi ktlah hjăn ti sang, mâo klei ktuê dlăng mơ̆ng bruă sag čư̆ êa alŭ wăl. Êngao kơ bruă ktuê dlăng phung tuê ti tač êdeh phiơr, jih jang dŭm kdrŭn êdeh ti čar Gia Lai mtă kơ êdeh êdâo hâo hưn, ktuê dlăng hŏng camera phung wĭt mơ̆ng ƀuôn prŏng Hồ Chí Minh čiăng gang mkhư̆ klei ruă tưp čar mkŏ mjing leh 4 anôk gak răng ktuê dlăng klei ruă tưp hlăm dŭm ktuê êlan dơ̆ng prŏng 14,19 leh anăn 25 mŭt hlăm alŭ wăl mơ̆ng krah mlan hruê 31-5, ktuê dlăng leh anăn lŏ dơ̆ng mbha êpul hŏng êdeh wĭt mơ̆ng ƀuôn prŏng Hồ Chí Minh.

Pô mblang: H’Zawut Ƀuôn Yă