VOV4.Êđê - Knơ̆ng bruă sang čư̆ êa čar Gia Lai mrâo mâo Hdră mtrŭn kơ Hdră kčah mkŏ mjing sang êa drao jing jai mdrao mnuih ruă Covid-19 mrô 2, hlăm boh klei ruă Covid-19 dleh ktuê dlăng. Hluê anăn, Sang êa drao jing jai mdrao mnuih ruă Covid-19 mrô 2 čar Gia Lai dưi mkŏ mjing ti Sang hră gưl krah Gia Lai - anôk tal 2 (ƀuôn prŏng Plei Ku) mâo hnơ̆ng 400-800 boh jhưng đih mdrao.

Phung dưi mdrao mgŭn jing mnuih ruă djŏ kman SARS-CoV-2 amâo mâo klei bi knăl amâodah mâo klei bi knăl ƀiă, tŭ jum, mdrao kơ phung djŏ Covid-19 hnơ̆ng hdjul leh anăn mâo klei ruă leh êlâo hdjul leh anăn phung lŏ wĭt djŏ kman klei ruă. Sang êa drao mâo 80 čô mă bruă, mprăp 71 mta kdrăp mdrao mgŭn, kdrăp mnơ̆ng leh anăn êa drao. Knơ̆ng bruă sang čư̆ êa čar jao kơ Anôk bruă mdrao mgŭn ƀuôn prŏng Pleiku klam bruă kriê dlăng, gĭt gai Sang êa drao jing jai mdrao mnuih ruă Covid-19 mrô 2.

H Zawut pô mblang