VOV4.Êđê - Leh mâo mnuih ruă Covid 19 mrâo jing mnuih mă bruă hlăm Adŭ bruă, anôk bruă sang čư̆ êa čar Gia Lai bi mlih leh hdră ngă bruă hluê êlan online lehanăn mkŏ mjing hdră bi ktlah hjăn kñăm rơ̆ng klei êđăp ênang hlăm hdră gang mkhư̆ klei ruă tưp. Klă klơ̆ng, mnuih mă bruă ti adŭ bruă sang čư̆ êa čar Gia Lai mâo boh tŭ RT-PCR djŏ kman SARS-CoV-2 hlăm hruê 26/10.

Leh hmao ƀuh mnuih ruă, Anôk gĭt gai hdră gang mkhư̆ klei ruă Covid 19 Gia Lai pral tui duah F1, kwang dar lehanăn ksiêm dlăng kman kơ 123 čô knuă druh, mnuih mă bruă ti anôk bruă, jih jang amâo mâo kman ôh. Êngao anăn, anôk bruă sang čư̆ êa čar Gia Lai ngă leh bruă hluê êlan online, rơ̆ng kjăp 5 Asăp mtă kñăm gang mkhư̆ klei ruă tưp. Aguah hruê 27/10, čar Gia Lai mâo leh 52 čô djŏ kman Sar CoV2 lehanăn 56 mta bi mguôp mơ̆ng 191 čô djŏ kman, dôk ksiêm bi mklă. Ară anei, 900 čô hlăk dôk dŏng mdrao./.

H Nêč pô mblang