VOV4.Êđê- Tlam mbruê (19/7), êpul gĭt gai bruă gang mkhư̆ klei ruă tưp Covid-19 čar Gia Lai bi tŭ ư kơ hdră êlan nao drông 1000 čô mnuih ƀuôn sang wĭt mơ̆ng ƀuôn prŏng Hồ Chí Minh lehanăn čar Bình Dương (jing dŭm anôk dôk mâo klei dleh ktuê dlăng mơ̆ng klei ruă tưp) wĭt kơ ƀuôn sang pô. Klă klơ̆ng, čar Gia Lai srăng mkŏ mjig klei tŭ drông 1000 čô mnuih ƀuôn sang, hlăm anăn mâo mnuih mduôn khua, hđeh êlăk, mnuih êngoh duam, mnuih knap mñai, luič bruă knuă, dŭm čô mnuih mă bruă jing mnuih djuê ƀiă, mniê ba tian. Êdeh dŭ mdiăng jing êdeh Otô amâo dah êdeh phiơr. Dŭm čô anei srăng wĭt ti alŭ wăl lehanăn ngă klei bi ktlah djŏ hŏng hdră bhiăn. Ti anăp klei dleh dưi ksiêm dlăng mơ̆ng klei ruă tưp Covid-19 hlăm dŭm čar jĕ giăm, mbĭt hŏng anăn ênoh mnuih mâo klei ruă tưp hlăm čar dôk hlăk đĭ, Gia Lai lŏ wĭt ngă bruă hlăm 21 anôk bi ktlah mbĭt ti čar, hŏng ênoh mnuih dưi bi ktlah jing giăm 3000 čô.

Pô mblang: Y-Ƀel Êban